Footer

OPINION: Kinapudno iti Serbisio , Adda pay kadi?

Adda met dagitay naparagsit a tumulong ngem kalpasan laeng nga adda “imbag” a maipaima kadakuada. Kayariganda ti lugan a saan nga agandar no awan ti gasolinana. Ngem kakaasi piman ti umili. Agsublisubli iti opisina a pagpatulonganna, mataktak ti orasna santo pay laeng awan ti banagenna.

Ti rigatna kadagitoy nga empleado wenno agtuturay nga agabuso iti takemda idinto a rebbengda koma ti agserbi iti publiko, uray matakuatan nga agar-aramidda iti maikaniwas, saanda met a madusa kas allagaden ti linteg no di maital-oda ketdi iti puesto, wenno maiyalisda iti puesto tapno maiyadayoda iti “uram”. Adun dagiti nabasbasa ken nangnangegtayo a nangangato nga opisial a naidarum gapu iti narugit ken saan nga umno nga aramidda ngem dida naan-ano iti puestoda. Yan ti rigatna, ti empleado a nangipulong kadakuada wenno nangibutaktak iti anomalia, isu piman ti nataltal wenno linipit ti agtuturayna.

Piman dagiti umili a babassit ken nakurapay ta isuda ti aglak-am iti tuok ken rigat gapu kadagitoy madi a maar-aramid. Kaasi dagiti pobre nga agbaybayad iti buis ta di met maipaay kadakuada dagiti imbag a rebbengda a sagrapen. Imbes nga agpaay ti buistayo kadagiti serbisio, agbalinda laeng a magasgastos kadagiti awan serserbina a bambanag. Agpaay laeng dagitoy a mangipatpatuloy kadagiti dakes ken nakillo nga aramid dagiti rebbengna nga agserbi iti pagimbagan dagiti umili. Ket no saantay nga agriing nga umili ken saan met nga agbalbaliw dagitoy sepsep ken sadut nga agserserbi, ti namnamaen ken dardarepdepentayo nga imbag ken naraniag a masakbayan, agbalindanto laeng a sirmata ken namnama ti lunod ken pannakairurumen.

Isu a kakabsat nga agserserbi, baliwantayon dagiti kababalintayo. Agserbitayo koman a sipupudno tapno agbalin a naraniag, naragsak ken naprogreso ti masakbayan toy pagiliantayo.

Datay met nga umili, agtimek ken aggunaytayo metten tapno maputed dagitoy saan a nasayaat ken di umno nga aramid dagiti agserserbi. Palagipan ken ipulongtayo dagiti dakes ti aramidna nga opisial ken empleado ti serbisio publiko. Agkaykaysatayo amin a mangipukkaw ken mangidarirag iti panagbalbaliwda. Agkaykaysatayo a mangtungday kadagiti dakes nga aramidda. Laglagipentayo a ti masakbayantayo ken dagiti maud-udi a kaputotan ti agsagaba no saantayo nga agtimek ken aggunay, no palubosantayo lattan nga agraira dagitoy nakaap-aprang ken nakarugrugit nga aramid dagiti agserserbi kadatayo.

Kadagiti met appo nga agtuturay, riingen ken luktantayo metten dagiti konsensiatayo ket dalusantayo kadi metten dagiti ahensiatayo babaen ti panangdusa ken panangiwalintayo kadagiti saan a maikari nga agserbi iti sapasap. Lipatentayon ti political patronage, paboritismo, panaggagayyem ken panagkakabagian. Kitaentayo ketdi ti pagimbagan dagiti kakailiantayo, ti naraniag ken nanam-ay a masakbayan dagiti annaktayo ken dagiti sumarsaruno a kaputotan.

Laglagipentayo koma a no ania ti imulam, isu ti apitem. Saanyo koma nga urayen a dumteng ti tiempo a malaglagipdakayo dagiti umili a pagwadan nga agserserbi iti gobierno, ibandoda ti panagyaman ken panagdayaw a mariknada para kadakayo, saan ketdi a panangumsi ken panangilunod kadakayo. Intay koma laglagipen ti pagsasao dagiti lallakay ken babbaket a ti napalabas ti nanggubuay iti agdama, ket ti agdama isut’ mangdisidir no anianto’t masakbayan.

Kakailian, agpanunottayo. Masapul a sungbatan ken subadantayo ti talek kadatayo dagiti umili.#

Comments are closed.