Footer

Polis a mainbolbar iti illegal nga aktibidad, naballaagan

LINGAYEN, Pangasinan – Binallaagan ti gobernador ditoy dagiti polis a dida mainbolbar iti illegal nga aktibidad nangruna iti droga iti sanguanan ti rakurak ti maysa nga opisial ti Philippine Drug Enforcement Agency a daytoy a probinsia ti pagtataudan iti illegal a droga iti Ilocos Region.

Imbatad daytoy ni Gov. Amado Espino Sr. bayat ti maysa a command conference a naangay iti Provincial Police Office ditoy itay nabiit.

“No adda man maitudok a maysa a propesional, ti polis dayta,” kinuna ni Espino idinto nga innayonna a no adda man dina kayat a makita, isu ti pannakasalungasing kadagiti bambanag nga insursurona iti napalabas.

“Maseknanak agsipud ta pasetkayo kaniak,” kinuna pay ni Espino.

Maipalagip a maysa a police official ni Espino sakbay a simrek iti politika.

Imbilin pay ti gobernador ti naing-inget a pannakirupak ti Philippine National Police ditoy maikontra iti illegal a droga, ken dagiti akyat-bahay gangs ken iti naing-inget a pannakasalaknib ken pannakapreserba iti aglawlaw.

Kinunana a masapul a naing-inget ti kampania ti kapolisan maikontra iti illegal a droga ken dagiti akyat-bahay gangs ken sindikato dagiti agtatakaw agsipud ta awan ti serserbi ti panangitantandudo ti gobierno probinsial iti turismo no saan a mapasardeng dagiti mannanakaw a mangbikbiktima kadagiti agindeg, turista ken balikbayan.

Iti dayta met la a kumperensia, indagadag ti gobernador iti polis ti naak-aktibo a panangannongda iti pannakapreserba ken pannakasalaknib iti aglawlaw ti probinsia babaen ti panangipakatda kadagiti espesial a linteg maikontra kadagiti illegal nga agpukpukan iti kayo ken illegal a panag-quarry.

Kanaig daytoy, imbilin ni Espino kadagiti amin a hepe ti polis ditoy probinsia iti panangipilada kadagiti kaso maikontra kadagiti barangay officials wenno mayor a matiliwan a manglablabsing kadagiti paglintegan iti aglawlaw ken mangab-abuso iti natural resources ti probinsia.

“Agtitinnulongtayo a makirupak iti moderno a rupak iti sangalubongan iti agdama, ti pannakaabuso ti aglawlaw,” kinuna ni Espino.#

Comments are closed.