Footer

SARITA: Nadaraan a linnaaw (Maikapito a paset)

NAGUGIS ni Padre Cristobal sa timmakder. Inagkanna ti Biblia sana indisso iti altar. Nagpusipos, linasatna ti salas ket inlukatna ti tawa. Mangrugin nga aglumen dagiti bituen iti pingping ti langit.

Immanges ni Padre Cristobal iti nauneg idi aplawan ti makapasalibukag a pul-oy. Anian a nagpintas ti agsapa! Naitanamitimna. Kasla nasam-it a samiweng iti panagdengngegna ti panagkanta dagiti pagaw iti kaleddaan a dangdanggayan dagiti dagiti anit-it dagiti andidit iti kakawatian.

Inunnat ni Padre Cristobal ti bagina ket kasla maysa a mannakigubat ti langana iti lima kadapan ken innem a pulgada a katayagna a dirdiram-osen ti apagtangkayag nga init. Simmabungay ti nasabang nga abagana nga ad-adda a pinagminar ti pangipeten a puraw a tisirtna. Adayo nga ub-ubing ngem iti uppat a pulo a tawenna.

Ngem naglumen ti raniag ti matana idi umagibas iti panunotna ti pannakapaayna idi kalman ken ni Mayor Aguimbag. Dina naaluadan ti nangemkem. Bulsek kadi dagiti agtuturay iti araraw dagiti babassit?

Iti umuna a panagkita, napintas a proyekto ti pannakapenned ti Karayan Ambatan. Agpayso a dakkel ti pagimbagan nga itdenna kadagiti umili iti Legleg. Mapartuat ti elektrisidad nga umdas a mangsilaw iti sibubukel a Legleg agraman dagiti barangay a kaparangetna a pakairamanan ti Begnas ken Bugnay. Makaparnuay pay iti panggedan agsipud ta pinullo a tattao ti masapul iti pannakaipasdek ti kalsada manipud iti national highway a dumanon iti penned. Sabali pay dagiti naruay nga umili a kasapulan iti pannakatuping ken pannakakali ti irigasion a pagpadanum kadagiti kataltalonan. Umadu ti maapit dagiti mannalon agsipud ta mabalinton ti agraep iti mamindua iti makatawen agsipud ta nabuslonton ti maawid a danum. Agdapag dayta iti ad-adu a masapulan dagiti mannalon.

Rang-ay ti ikarkari ti pannakapenned ti Karayan Ambatan.

Ngem no sukimaten a nalaing ti proyekto, maduktalan a maysa wenno dua laeng a tao ti agnaar iti pannakapenned ti Karayan Ambatan, ni Mayor Aguimbag ken dagiti kabagianna.

Iti kaaddanton iti padanum kadagiti kataltalonan, ni Mayor Aguimbag ti kangrunaan a mabenepisiaran agsipud ta dandani kukuana amin dagiti kataltalonan iti Legleg ken kaparangetna a barangay. Sumagmamano laeng dagiti umili nga addaan iti sangkapit-ing a talon a linawlaw dagiti talon ti mayor ngem nain-inut a nagatang dagitoy ti mayor babaen ti pammutbuteng wenno pananglipit.

Maysa ni Crispin, anak ni Mang Tomas, kadagiti saan pay a nangilako iti talonna iti mayor. Ngem agsagsagrap ni Crispin iti pananglipit manipud kadagiti katalonan ti mayor. No panagraraep, bassit ti madilamutan ni Crispin a danum manipud iti pay-as ta awiden amin dagiti katalonan ti mayor. Naynay ti panagriri ni Crispin ngem agtungpal la ti reklamona a di maitaltalek. Idi agangay, binay-anna lattan ta dinto maisarsarak.

Ngem nasikap ti mayor. Narigat a busoren. Ita, naammuan ni Padre Cristobal a beltaken ti kalsada ti mismo a katengngaan ti talon ni Crispin. Agbalinton a kabatuan ti talonna. Ania pay ti maay ti talonna no kasta?

Ngem kangrunaan a sumupiatan dagiti taga-Begnas ken taga-Bugnay ti pannakairamraman ti kamposantoda a lasatan ti maipasdek a kalsada. Kadagiti lumugar, maysa dayta a panangtupra iti kannawidan ken pammatida. Kadagiti natibo iti kabambantayan, sagrado a lugar ti nakaitaneman dagiti minatayda ket maysa a panagbasakbasak iti kinasagrado ti lugar iti pannakaipasdek ti kalsada iti kamposantoda.

Daytoy ti pagam-amkan ni Padre Cristobal nga agbalin a mitsa iti riribuk iti kabambantayan.

Agbaw-ing koma ni Padre Cristobal idi mataldiapanna ti lalaki a sumrek iti inaladan ti kapilia. Ni Lakay Selmo, ti katalek ni Arsobispo Santos. Dinagdagusna ti immulog ket sinabatna ti lakay.

“Naidaw-aska man, Tata Selmo?” nakunana. Inyawisna ti yuunegda.

“Adda paited a surat ni Arsobispo, Padre Cristobal, insungbat ti lakay. Inyawatna ti surat.

Linuktan ni Padre Cristobal ti surat. Nagkuretret ti mugingna idi mabasana ti linaonna.

Papaayaban ti arsobispo ta kayatna a maammuan no pudno ti dimmanon kenkuana a pulong a tumultulong kadagiti kabusor ti turay ken mangsulsulbog kadagiti taga-Begnas a bumusor kadagiti agtuturay iti Legleg!

Saan a pudno dagita! rimkuas ti rikna ni Padre Cristobal. Nangemkem. Panangsulbog kadi a bumusor iti turay ti panangitakderna kadagiti taga-Begnas maikontra iti masirmatana a pannakaidadanes ti kalinteganda gapu iti proyekto a pannakapenned ti Karayan Ambatan a maysa met laeng a tao ti maisagut?

Maysa daytoy a pammadpadakes kenkuana, naisipna. Plano la ketdi ni Mayor Aguimbag tapno mapukaw a balangan iti pannakapenned ti Karayan Ambatan!

(Adda tuloyna)

Comments are closed.