Footer

2000 nagaplay iti trabaho iti Jobs Fair

CANDON CITY – Aganay a 2,000 nga aplikante ti nagaplay iti trabaho iti dua nga aldaw a jobs fair a naisayangkat ditoy itay nabiit.

Daytoy ti inwaragawag ni House Deputy Speaker Eric Singson kalpasan ti naballigi a jobs fair nga inesponsoranna a naangay iti Stern Mall ditoy siudad itay Mayo 30-31 para kadagiti kakailianna iti maikadua a distrito nga awanan iti panggedan.

“Ito na ang isa sa mga successful na dinaluhan naming jobs fair. Maraming applicants, at halos qualified lahat ang mga nag-apply sa amin,” kinuna ni Yolanda Dalmas ti Seven Ocean International Manpower Inc., maysa kadagiti ahensia a nakipaset iti nasao a jobs fair.

Aganay 10 a recruiting agency ti nakipartisipar iti nasao a jobs fair a nakikammayyetan ti Philippine Overseas Employment Administration (POEA) ken Department of Labor and Employment (DOLE).

“Dagitoy nga ahensia ti pinilimi nga agrekrut kadagiti agtrabaho para iti abroad agsipud ta awan ti dawatenda a placement fee ket di maparigatan dagiti aplikante iti panagsapulda iti trabaho,” kinuna ni Singson iti interbio kenkuana ti media.

Kinuna ni Nonette Villanueva, chief operation for region ti POEA, a naidiaya iti jobs fair dagiti trabaho kasapulan dagiti pagilian ti Saudi Arabia, Dubai, Korea, Hongkong, Taiwan ken dadduma pay a pagilian.

Kinuna ni Dalmas nga aganay 95% a kualipikado dagiti aplikante ken sinaganaanda ti jobs fair agsipud ta dandani kumpleto amin dagiti kuyogda a dokumento kas iti passport, medical clearance ken dadduma pay a kasapulan iti panagbirokda iti trabaho.#

Comments are closed.