Footer

BANNER NEWS: MOA para flood early warning system, nagpinnirmaan LGUs, ahensia ti gobierno

VIGAN CITY – Nagkaykaysa dagiti nadumaduma nga ahensia ti gobierno ken dagiti lokal a gobierno a pakairamanan ti gobierno probinsial para iti pannakaipasdek ti nakabase iti komunidad a flood early warning system tapno maikkan iti pannalaknib dagiti agnaed iti probinsia nangruna dagiti adda kadagiti coastal barangays.

Maysa a memorandum of agreement ti napirmaan iti nagbabaetan dagiti dadaulo dagiti ahensia a pakairamanan ti Philippine Atmospheric Geophysical and Astronomical Services Administration (PAGASA), Department of Science and Technology (DOST), Office of the Civil Defense, gobierno probinsial ken dagiti nadumaduma nga LGUs iti probinsia bayat ti training and dry-run ti hazard mapping and assessment para iti epektibo a community-based Disaster Risk Management wenno READY project a naangay iti kapitolio idi Mayo 29.

Naipalaon iti nasao a MOA ti panagkikinnamayyet dagiti ahensia a mangiwayat kadagiti addang ken panagsisinnukat iti impormasion tapno mamanehar ken malapdan ti didigra nga ipaay ti layus iti Ilocos Sur.

Agbalin met a rebbengen ti gobierno probinsial ti panangammo kadagiti lugar a pakaipanan dagiti ramit a mausar iti panangobserba iti danum, panangorganisa iti panagsanay kadagiti boluntario nga observers ken mangsiguro iti pannakamantener, seguridad, ken pannakataginayon dagiti naiyinstolar a ramit.

Kabayatanna, inwaragawag dagiti mangimaton iti READY project a naiyinstolardan dagiti ramit a mausar iti panagmonitor kas iti water level gauge, digital ken manual rain gauge ken tide gauge a naipasdek iti 10 a river basins a masarakan iti 17 a munisipalidad ken 2 a siudad a pakaibilangan ti Abra River basin (Santa, Bantay, Caoayan, Sta. Catalina, Vigan City); Sinait River basin (Sinait); Cabugao River basin (Cabugao); San Juan River basin (San Juan); Bantaoay River Basin (Sto. Domingo, San Ildefonso, San Vicente); Narvacan River basin (Narvacan); Sta. Maria River basin (Sta. Maria); Candon River basin (Santiago, Candon City); Buaya River basin (Sta. Lucia, Sta. Cruz); ken Amburayan River basin (Tagudin).#