Footer

Ilocos Sur Hotline, nagiwaras iti bags, school supplies para Gr. I pupils

VIGAN CITY – Dua gasut ket walopulo nga ubbing manipud iti nadumaduma nga ili iti probinsia a sumrek iti Grade I ti winarasan ti Ilocos Sur Hotline iti bag ken school supplies itay nabiit.

Nagbalin a resipiente ditoy dagiti ubbing a nagsurat ken ni Gov. Deogracias Victor Savellano babaen ti Ilocos Sur Hotline, programa ti gobierno probinsial a tumulong kadagiti agkasapulan nga umili ditoy probinsia nangruna dagiti marigrigat.

Tunggal ubing, naikkan iti school bag a naglaon iti papel, notebooks, lapis, pencil case, eraser, crayola ken dadduma pay a kasapulan iti eskuela.

Impalgak ti gobernador nga agiwaras ti grupoda iti bags ken school supplies kadagiti ubbing iti ili a San Juan, Cabugao, ken Sinait inton Hunio 10 idinto a sumarunonto dagiti ubbing manipud iti maikadua a distrito ti probinsia.

Kinuna ti gobernador a maysa daytoy nga addang ti gobierno probinsial a mangguyugoy kadagiti ubbing nga agbasa iti baet ti kinarigat ti panagbiagda.#

Comments are closed.