Footer

INDAYON NI LAGIP: Dagiti Piglat iti Biagko (Tuloyna)

Nadanon ti panaglukat ti klase iti elementaria, Manong Danny. Kasta unay ti ragsakko ta napanak impalista ni Nanang Marie. Impagarupko a kunkunana laeng ti panangpabasana kaniak.

Sakbay a mapanak agbasa, naiwaywaykon ti baka, nakasagadakon iti paraangan ken naisaganakon ti pammigatmi. Nakurang maysa kilometro ti pagnaek a mapan agbasa. Masansan nga awan a kuartak ken kamatis wenno kamotit laeng ti innapuy a pangaldawko. Ngem naragsakak lattan, Manong Danny, ta pinagbasanak ni Nanang Marie.

No kasdiay a recess, agpakniak iti amianan ti eskuela ket agrepasoak iti leksionmi imbes a makigrupoak kadagiti kaklaseak. Sutilendak ngamin no kasdiay a makitada nga awan ti igatangko iti recess. Saanko lattan nga intaltalek ida agingga iti naumada met laeng.

Maysa nga aldaw, agbasbasaak iti leksionko iti sirok ti banaba idi immasideg da Belinda ken Helen. Saan unay a makasursurot dagitoy iti klase ta ad-adda met a ti agtelebabad ti ar-aramidenda.

“Hoy Nora, kopiaenmi man tay assignmenttayo,” kinuna ni Belinda.

“Mandiak, agaramidkayo met iti assignmentyo,” insungbatko.

“Nagtangsitkan!” kinuna ni Belinda ket pinungotnak.

“Ibbatannak!” nakunak ket inwadagko. Uray la naidaramudom ni Belinda iti pigsa ti panangiduronko. Bimmangon ket dinarupnak. Nagludonkami iti daga.

Apagisu met a limmabas ti maestrami ket pinagsinanakami.

“Apay a nagapakayo?” imbaniekes ti maestrami.

“Ni Noraly, ma’am, pinungotnak idi diak kayat a padawatan iti merienda,” kinuna ni Belinda.

“Wen, ma’am,” insarurong met ni Helen.

“Kasta?” pimmidut ti maestrami iti bislak ket pinanalpiitna ti ubetko. Uray la naapputko ti kutitko gapu iti sakitna. Nakaluaak.

Ginuyabandak da Belinda ken Helen sada immadayo nga agkatkatawa.

Kunak no saanen a dumanon pay ken ni Nanang Marie ti napasamak. Ngem idi sumrekak iti paraangan, nakitak ni Nanang Marie a nakatugaw iti sirok ti mangga. Idi makitanak, sinabatnak ket kasla sumged dagiti matana a nangpungot kaniak.

“Salbagka nga ubing, apay a kinabilmo diay anak ni Mare Celia?” urayak la nagtiritir iti sakit ti kuddotna iti luppok.

“Isu ti nangpungot kaniak, Nanang!” nakunak.

“Ne, ta nalaingka payen nga agulbod!” nakuna ni Nanang Marie.

Iti dayta a rabii, saanak a pinakan ni Nanang Marie. Naturogak nga awan ti karga ti tianko.

Diak naaluadan ti panagarubos ti luak. Inay-ayko ti agdama a kalak-amak.

(Adda tuloyna)

Comments are closed.