Footer

Kapolisan iti rehion I agdalan ad-adu a panagsanay a pumaltog

CAMP Brig. Gen. Oscar M. Florendo, San Fernando City – Kinuna ni Police Regional Office I Police Chief Supt. Ramon Gatan a gapu iti nababa a resulta ti firearms proficiency test a naangay idi napan a tawen, kagudua iti kapolisan iti rehion uno ti masapul nga agsanay pay a pumaltog.

Addaan iti overall passing rate nga agarup 50% dagiti kapolisan iti rehion uno iti firearms proficiency test a naangay itay napan a tawen.

Idi napan a bulan, maysa nga opisial ti National Police Commission (NAPOLCOM) ti nangibatad a 10% laeng iti 125,000 a kameng ti PNP ti nakapasa iti shooting skills test.

Ngem kinuna ni Gatan a naibasar ti nasao a proficiency test, saan nga iti pagbatayan ti PNP no di iti pagbatayan ti International Defensive Pistol Association (IDPA).

Segun iti immun-una a palawag ni PNP Chief Jesus Verzosa, adayo a narigrigat ti pagbatayan ti IDPA agsipud ta agpaay daytoy kadagiti makisalsalip iti shooting competitions.

“Iti pammilin ni General Verzosa a mangi-adjust iti competence level ti firearms proficiency test, namnamaentayo ti nangatngato a passing rate manipud ita,” kinuna ni Gatan.

Kinuna ni Gatan nga itultuloyda ti panangasa iti abilidad dagiti polis a pumaltog babaen ti regular a pannakaiwayat iti unit training a maipangpangruna dagiti naka-assigned iti field ken kadagiti miembro ti regional ken provincial mobile groups.

Dagitoy a grupo ti kangrunaan a maipasungalngal iti kontra insurhensia ken espesial nga operasion, segun ken ni Gatan.#