Footer

SALAYSAY: Panggedan ti kangrunaan koma a sanguen ti gobierno

No adda man kangrunaan a sanguen ti gobierno iti agdama, awan sabali no di ti pannakaadda iti panggedan dagiti awanan trabaho. Nakakaalarma ti kinaadu unayen ti bilang dagiti awanan trabaho iti agdama.

Masansan a maitudtudo a makaigapu ti kinaadu ti agreduar iti eskuelaan ken kadagiti trade school ngem awan met ti maited a pagtrabahuan. No isipen a nalapat, kasla maymaysa ti pangnamnamaan dagiti agsapsapul iti trabaho, iti mangged sadiay ballasiw taaw. Kasla adda sadiay ti namnamada.

Dakkelen ti bilang dagiti awanan trabaho ta umaboten iti 34.2 a porsiento idi Pebrero, wenno nasurok a 14 a milion ti bilangda. Agtultuloy pay ti panagadu dagitoy gapu iti agtultuloy a panagikkat dagiti dadakkel a kompania kadagiti trabahadorda maigapu iti dakes a kasasaad ti ekonomia a nangapektar iti intero a lubong. Ti global economic meltdown ti rason ti panagserra dagiti dadakkel a kompania a kas iti Intel ken dadduma pay. Impakaammon dagiti dadduma a dadakkel a kompania ti panagikkatda iti trabahador. Umabut iti milion dagiti maikkat iti trabaho.

Dakkel a parikut ti gobierno ti pannakaikkat dagitoy a trabahador. Iti electronics sector, kas iti Amkor, Panasonic, Accenture, ken dadduma pay, adun dagiti inikkatda. Saan laeng a dayta, naiwaragawag metten dagiti kompania iti garments ken ignition wiring nga agsagsagabada iti pannakalugi ket agikkatda iti empleado iti agarup kagudua a milion.

Nakabase amin dagitoy a kompania kadagiti export processing zones. Tapno masalbar ti kompania, inkapilitan nga itanggaya dagitoy ti masapa a retirement wenno nawaya a panaglusulos tapno maala dagiti mangmangged dagiti benepisioda ken dadduma pay nga insentiboda.

No saan nga agrekrut dagitoy a kompania kadagiti trabahador no di agikkatda pay, ania ngarud iti pangnamnamaan a serkan dagiti naikkat iti trabaho ken dagiti kagradgraduarna iti eskuelaan ken iti trade school? Dakkel la ketdi daytoy a parikut a sangsanguen ti gobierno a rumbeng a masolusionan.

Uray dagiti sabsabali a nasion ket agsagsagabada iti kapadana a parikut. Iti laengen seamen sector, agarup 130, 000 dagiti naikkat. Agtultuloy met dagiti dadduma a sektor ti panagikkatda kadagiti trabahadorda ken panangisardengda iti panagrekrutda.

No saan a maisapulan iti kabiitan a panawen daytoy a parikut, sisasango la ketdi ti pagilian iti dakkel unay a buong ti ulo iti masakbayan.

Ti rigatna, iti daytoy a tawen, namnamaen a saan unay a maikaskaso daytoy a pakarikutan ta sabali ti pakaipaayan ti imatang dagiti politiko wenno sabali ti pakarikutanda. Umadanin ti eleksion nasional nga adda a mangited iti ad-adu a kusukuso. Maipasuli pay laeng dagiti parikut a kangrunaan koma a tamingen.

Iti pannakabaybay-a ti nasao a pakarikutan, wenno uray iti panangitantan man laeng a panangaksion, dumegdeg la ketdi ti kasasaad ti panagbiag ken ti ekonomia. Panawenen ti panaggunay ken panagtrabaho iti maitutop a solusion ta no saan, namnamaen ti nakuyem a masakbayan.#

Comments are closed.