Footer

SARITA: Nadaraan a Linnaaw (Maika-14 a paset)

Nagkintayeg ni Padre Cristobal iti dayta a simmiplot iti panunotna.

Kellaat a nangikeddeng: agsubli iti Legleg bareng makamakamna pay da Palwew, aniaman ti gandatda iti dayta nga ipapanawda. Urayennanto laengen iti simbaan ti bangkay ni Ama Dalmeg tapno maimisa sakbay a maitabon.

Impalgak ni Padre Cristobal ti panggepna a panagsubli iti Legleg iti dayta a rabii ken ni Ama Indoyeng, kabsat ni Ama Dalmeg.

“Agligsayen ti labii, Padle. Baka masalamaandaka dagiti kakadua wenno dagiti agronronda a polis ket maisagmakka,” kinuna ti lakay.

“Adda napateg a gagarak iti Legleg,” nakuna ni Padre Cristobal. “Dika madanagan, agannadak iti panagdaliasatko.”

Sinaltaan ni Padre Cristobal ti kabaliona. Iggem ti kannigid nga imana ti sangametro ti kaatiddogna a kasla takiag ti ubing a saleng. Daytoy ti pagsilawna iti dalan.

Ammona a napeggad ti panagdaliasatna iti kangitingitan ti rabii. Ngem mangnamnama a nakaturog itan dagiti mangrabrabii a tattao, kakadua man wenno kabusor ti simbaan.

Saan a ti kalsada ti sinurot ni Padre Cristobal no di ti panglintegan a desdes. Kadarato awidenna wenno dissaaganna ti sakayna sana wanawanan ti dalanna aglalo iti paset a nabato ta dinto ket maidaramudom ti kabalio.

Salogen ti daldaliasatenna. Nabuak ti maysa a tumatayab ket kasta unay ti irina a kimmayabkab nga immadayo.

Inyangad ni Padre Cristobal ti rupana iti langit a narnuoyan iti bituen. Dandanin aguurnos ti Gagan-ayan. Iti adayo nga amianan, kasla kulintaba nga agpukaw-agadda ti lawag dagiti pagsaingan wenno lampara kadagiti porked a pagtaengan iti Bugnay. Narnekan la ketdin ti turog dagiti agindeg.

Kellaat, nasisirap iti lawag ti flashlight a naisarang iti rupana.

“Agsardengka! Poliskami!” gimluong ti timek manipud iti puon ti kayo iti makannigidna. “Asinoka!”

“Siak ni Padre Cristobal, kura paroko ti Legleg,” insungbat ni Padre Cristobal. Ingngatona ti dua nga imana tapno makita dagiti nangsitar kenkuana nga awan ti armasna.

Nagin-inayad nga immasideg ti maysa a panguttongen a lalaki a nakaiggem iti paltog. Saan a nagkir-in ni Padre Cristobal. Siguraduenna nga adda pay kadua daytoy nga agkulkul-ob kadagiti kakaykaywan.

“Padre, sika gayam,” nakuna ti lalaki. “Nagrabiikan iti langalang!”

“Kagapgapuk iti Begnas, iti minatayan,” nakuna ni Padre Cristobal. “Agsubliak met la iti Legleg ta panko isagana ti pagmisaak ton bigat.”

Nagsasarutsot a rimmuar ti uppat pay a tattao. Nakaiggemda amin iti paltog.

Inyam-ammo ti lalaki ti bagina ken dagiti kakaduana. Manolo ti nagan ti pannakapanguloda. Polisda iti Bugnay.

“Kuyogendaka agingga iti pagbeddengan, Padre. Dimo kadi ammo a napeggad ti agdaliasat iti daytoy a lugar?”

“Agyamanak unay,” kinuna ni Padre Cristobal. “Naimbag a gayyem ni Ama Dalmeg ket pagrebbengak ti mangmisa iti pannakaimassayagna.”

“Wen, nasayaat a tao ni Ama Dalmeg. Ngem nagbiddut da Palwew a polis-Bugnay ti nangpatay kenkuana. Pasurot ti maysa a politiko ti suspetsami a nagaramid.”

“Asino a politiko?” timmadem ti mata ni Padre Cristobal a naiturong ken ni Manolo.

“Ta ngiwatmo!” sinidol ti sabali ni Manolo.

“Agpatingga laeng a suspetsa, Padre,” saan nga intaltalek ti agnagan Manolo ti kaduana. “Awan saksi. No adda man, dina la ketdi maitured ti agsao ta dinto ket maisublat a maipalnaaw.”

Nagari ti ulimek. Ngem agdakdakiwas ti utek ni Padre Cristobal. No pudno ti impalgak ni Manolo, maymaysa laeng a politiko ti makaitured ken addaan iti motibo a mangibilin iti pannakapapatay ni Ama Dalmeg. Ni Mayor Aguimbag!

Kellaat, napasardeng ti grupo idi adda gimluong iti adayo a daya. Napasarunuan iti dua pay a napipigsa a kanalbuong.

Ti maipatpatakder a penned iti Karayan Ambatan: dagus nga immapay iti panunot ni Padre Cristobal.

(Maigibusto)

Comments are closed.