Footer

99% matuloy ti eleksion inton 2010: Cong. Eric

CANDON CITY – No ni House Deputy Speaker Eric Singson ti pagdamagan, sigurado a matuloy ti eleksion, uray pay iti sanguanan ti pannakaipursigi ti charter change.

Iti interbio ti media kenkuana itay nabiit, kinuna ni Singson a “para kaniak… 99 percent, tuloy ti eleksion.”

Kinuna ti diputado nga uray maamendaran ti konstitusion, matuloy ken saan a maisanud ti eleksion.

“Matuloy daytoy. Uray pay kas pangarigan, adda constitu-tional amendments… tuloy pa rin yan, hindi iuurong yun,” kinuna ti diputado a mangibagi iti maikadua a distrito.

Ngem itay Hunio 2, inaprobaran dagiti agilinlinteg iti Kamara a kaaliado ni Pres. Gloria Arroyo ti Resolusion 1109 a mangawag kadagiti miembro ti Kongreso nga ag-convene a kas constituent assembly wenno con-ass nga agisingasing kadagiti amienda iti Konstitusion uray awan ti partisipasion ti Senado.

Itay Mierkoles, Hunio 10, naisayangkat ti rali a nakipartisiparan dagiti nadumaduma a civil groups kas panagprotestada iti pannakaamendar iti konstitusion babaen ti constitutent assembly iti Makati City.

Kabayatanna, kinuna ni Singson a kalpasan ti merger ti partido a Lakas ken Kampi, awan pay ti maibaga a para presidente ti partido.

Nupay kasta, kinuna ti diputado nga iti uneg ti dua a bulan, maammuanton no sino ti standard bearer ti partido a kas napagnunummuan dagiti top brass ti partido.

“In two months time, they will come out with a national candidate… iti Agosto ket mabalin nga addanton konbension,” kinuna ni Singson.#