Footer

Agar-aramid peke a shampoo, nakasuan

CANDON CITY – Lima a tattao ti nakasuan iti city prosecutor’s office ditoy gapu iti mapapati a panagpartuat ken panaglakoda iti peke a shampoo.

Naammuan ken ni P/Supt. Emmanuel Reyes, hepe ti polis ditoy siudad a nakasuan iti panaglabsing iti RA 8293 wenno Intellectual Property Code iti City Prosecutor’s office da Roselyn Fructuso, 34; Gina Canayong, 38; Corazon Garcia, 48, ken Jarry Antonio, 34, agpapada nga agnaed iti Malambing Street, Novaliches, Quezon City; ken ni Mark Rodel Lapesara, 24, residente iti Pilar, Abra .

Sakbayna, natiliw dagiti suspetsa iti raid nga insayangkat dagiti polis iti Room 307 ti Candon Lodge, Barangay San Antonio nga inupaanda babaen ti bileg ti search warrant a pinirmaan ni Judge Policarpio Martinez ti RTC Branch 71 ditoy siudad.

Nakumpiskar dagiti otoridad kadagiti suspetsa dagiti nadumaduma a plastic container ti nadumaduma a brand ti shampoo, nakaplastik a shampoo, kemikal a pagaramid iti shampoo, liquid substance nga agmaris iti puraw, transparent plastic ken Nokia N1208.

Segun ken ni COP Reyes, templaen dagiti suspetsa ti peke a shampoo sada ikarga kadagiti plastic containers dagiti nadumaduma a brand ti shampoo sada mapan ilako kadagiti nadumaduma a lugar iti nababa a presio kas promo sales.

Kabayatanna, nasurok P50,000 ti napukaw ti dua a baket iti Budol-Budol gang ditoy siudad.

Napukawan dagiti biktima a da Carmen Toquero, 60, ken ni Rosita Noble, 68,, agpada a residente iti Parioc Primero iti cash nga agdagup iti P56,000, selpon a Nokia ken relo.

Segun dagiti biktima, bayat ti kaaddada iti McDonald’s, naallilaw ida dagiti suspek a mangited iti kuartada, selpon ken reloda kas sukat ti nalabaga a pouch a naglaon kano iti kuarta.

Idi lukatan dagiti dua ti pouch, naduktalanda laengen a pappapel ti linaonna.#

Comments are closed.