Footer

BANNER NEWS: Iti baet kaadda’t bidding, nanginngina mailako ag-agas iti GSGH ngem pribado a botika

VIGAN CITY – Iti baet a naglasatda iti bidding, nanginngina ti agas a mailako iti Gabriela Silang General Hospital ngem iti pribado a botika iti ruar.

Ngem kinuna ni Gov. Deogracias Victor Savellano a masursurot ti umisu a proseso ti bidding dagiti ag-agas para kadagiti district hospitals iti probinsia.

Daytoy ti reaksion ti gobernador mainaig iti kontrobersia no apay a nangingina ti mailako nga agas iti uneg ti Gabriela Silang General Hospital ngem iti pribado a parmasia iti ruar.

Maysa a resolusion ti indatag ni Bise Gobernador Jerry Singson iti sangguniang panlalawigan a mangkidkiddaw iti pannakasukat dagiti kameng ti Bids and Awards Committee gapu iti kapaliiwan a nanginngina ti agas a mailako iti uneg ti ospital ngem iti botika iti ruar.

Bimtak ti word war iti nagbaetan ti bise gobernador ken ni Engr. Virgilio Llanes a mapapati a nagramut iti nasao nga isyo ken iti mapapati a saan a panagpirma ti naud-udi iti liquidation dagiti doktor ti Gabriela Silang General Hospital tapno maituloy ti pannakaited ti endowment fund manipud ti Philippine Charity Sweepstakes Office.

Mapapati a saan a kayat a pirmaan ni Llanes, hepe ti provincial engineering office, ti nasao a liquidation ti GSGH agsipud ta awan ti permit to operate ti pharmacy cooperative iti uneg ti nasao nga ospital.

Iti immmun-una nga interbiona iti radio, linagidaw ni Bise Gobernador Jerry Singson no apay a nanginngina ti agas a mailako iti uneg ti Gabriela Silang General Hospital ngem iti pribado a botika iti ruar ti ospital.

Segun ken ni Singson, iti miting nga inangayna a tinabunuan dagiti kameng ti Bids and Awards Committee, iti panagsaludsodna iti maysa nga opisial ti GSGH, limtuad nga agpateg iti nasurok P100 ti maysa a suero idinto a P70 laeng iti ruar.

“Baliktad, imbes a nababbaba ti agas iti uneg ti ospital, nanginngina met,” nakuna ni Singson idinto nga inyunay-unayna a naglasatda pay iti bidding.

Ngem iti immun-una nga interbiona, nakuna ni Singson nga awan ti basol dagiti doktor no apay a nanginngina ti agas a mailako iti ospital agsipud ta sumangpet lattan dagiti agas iti ospitalda.

Ngem inkalintegan ni Savellano a masursurot ti umno a proseso ti pannaka-bid dagiti agas a gatangen ti gobierno probinsial para kadagiti district hospitals iti probinsia.

Innayon ti gobernador a no saan a masurot ti umno a pannaka-bid dagiti agas, makasuan dagiti kameng ti Bids and Awards Committee.#