Footer

EDITORIAL: Di mamingga a panagkusit

Agsasallupang dagiti panagkusit iti pagilian. Awan ti pakakitaan ti panagngudona no di ket mapaliiw a kumarkaro ketdi. Awanen ti pakakitaan ti delikadesa kadagiti agtuturaytayo.

Uray ti inaladan ti DepEd ket saanen a nakalasat iti kontrobersia. Dakamatentayo ditoy ti akusasion nga overpriced dagiti noodles nga isupsuplay ti Jeverps Manufacturing Corporation iti DepEd para iti Food for School a programa daytoy nga ahensia ti turay  para kadagiti indigent preschoolers ken Grade I pupils iti sapasap a pagilian.

Dakamatentayo ditoy a pinaglibakan dagiti agtuturay ti DepEd ti alegasion nga overpriced dagiti noodles ken dina pinaboran ti kakaisuna a kompania a nakaiyawatan ti kontrata a mangsuplay iti departamento iti noodles para iti Foor for School a programana.

Pudno man wenno saan ti alegasion, nangina dagiti noodles a pagbusbusbosan ti gobierno para kadagiti agbasbasa nga ubbing, dagiti indigent a preschoolers ken Grade I pupils iti sapasap a pagilian.

Iti presio ti 100 grams a noodles a P18.00, nangina unay no maidilig iti 55 grams a noodles nga agpresio laeng iti P6.00 iti merkado. Ala, uray dobliem ti presiona, agkidar laeng a P12.00. Iti daytoy a kuenta, nagpukaw ti gobiernotayo iti dakkel a gatad a posible nga umabot iti gasut a milion, aglalo ket idi pay la kanikalima a tawen a nangrugi daytoy a feeding program ti DepEd.

Ti makapamisuot no apay a di kinontra ti DepEd ti kastoy a klase ti kontrata. Imposible a saanda nga ammo ti presio ti maysa a pakete. Ala, uray naangkat pay iti ballasiw-taaw dagiti ramen ti noodles, nangina latta. Sayang ti kuarta a napukaw ti gobierno. Sayang ti buis ni Pinoy a nabusbos a di koma nagastos no nagridam dagiti opisial ti DepEd.

Di met tinawen nga agkurkurang dagiti libro nga aramaten dagiti agbasbasa iti pagadalan publiko? Di met agkurang dagiti siled-pagadalan? Di met bassit-usit ti sueldo dagiti mannursuro? Adu dagiti kurang. Mano a libro, kuarto ken tugtugaw ti pakaigatanganda dayta masirsirip a napukaw ti gobierno gapu iti nangina a noodles?

Ita, sinuspende ni Sec. Jesli Lapuz ti programa kalpasan ti alegasion nga overpriced dagiti noodles. Mapaidaman dagiti ubbing iti kasapulanda a taraon.

Ngem iti kastoy a programa, saan a maikkat ti suspetsa a saan a dagiti agkasapulan nga ubbing ti puntiria a pakanen no di adda sabali a ngiwat a mangallawat kadayta taraon. Ti makadakes no pudno ti suspetsa a naaramat dagiti ubbing para iti bukod a pagimbagan ti sumagmamano laeng.

Kuestion ditoy ti kinaawan ti sinseridad dagiti adda iti takem nga agserbi. No koma ta maaramat nga umno dagiti pondo, nalabit, saan koma a kastoy ti kinarigat ti panagbiag ni Pinoy. Dakkel koma ti dumur-asanna.

Ngem agingga a di agpatingga dagiti aramid a makarimon, agingga nga adda panagimbubulsek kadagiti aramid a maikaniwas, agtultuloy latta iti intay panagkaradap iti karigatan.#

Comments are closed.