Footer

INDAYON NI LAGIP: Dagiti Piglat iti Biagko (Tuloyna)

Inyangadko ti rupak ket nakitak ti nagmanto a tangatang a kas man makipagrikna iti nakaro nga ulpit a sagsagabaek ti denna ti imbilangko nga ina. Ay-ayek unay ti bagik ta saan a tao ti panangtratarna kaniak. Imbag pay ti baka a taraken ta maiwayway nga agarab iti ruot iti agmalem sa maiyawid ken maisubli iti koral.

Nagkukotak iti suli idinto a piniselko ti tianko. Iti panaguyas ti rabii, simmuknor ti lamiis idinto a kuminnit ti bisinko a di mangpaturog kaniak. Sumanengseng dagiti lamok.

Bimmangonak iti pumarbangon ta diakon maibturan ti bisinko. Ngem anian a pannakaupayko ta naibalunet ti rikep ti kadaklan.

Nataldiapak ti makopa a narnuoyan ti bungana. Nangpurosak iti tallo. Dagitoy ti pinangpedpedko iti bisinko.

Kabigatanna, agkakapsutak a bimmangon. Napanko inwayway ti baka. Nagapuyak kalpasanna. Adda nabati a kagudua ti tinuno nga ikan iti ngato ti dalikan ket daytoy ti innalak a balonko. Napanak nagpuros iti kamatis iti kanatengan iti likud ti balaymi. Napia la nga isimotko iti innapuy.

Napardas ti panaglabas ti bulan, panagserran ti klase. Uray no kaskasano, nangato ti gradok. Addaak iti maikalima a kangatuan iti klasemi.

Imbagak ken ni Nanang Marie nga isu ti mangisab-it iti ribonko. Ngem binugtaknak ketdin. Dina kano masango. Saanakon a nagun-uni. Ammok nga adda problemana ken ni Tatang Andres. Nasukalan ni Nanang Marie nga adda babai ni Tatang Andres. Nagririda idi kanikadua nga aldaw. Agingga ita, di pay simmangpet ni Tatang Andres.

“Sika ti malas ditoy balay isu a makaammokan iti biagmo!” kinuna kaniak ni Nanang Marie.

Namrayak laengen ti naglua iti suli, Manong Danny. Idi agangay, napanak iti sipi ket nagukagak iti daan a lakasa. Nakakitaak iti puraw a bestida. Panakkelen ngem daytoyen ti isuotko, nakunak iti bagik. Dinagdagusko a linabaan. Nakakitaak iti daan a nangisit a sapatos. Binugguak sako ninasnasan agingga iti napukaw bassit ti kusapona.

Mababainak idi makadanonak iti pagadalanmi iti malem kabigatanna. Nagpipintas dagiti bado dagiti kaklaseak. Ad-addan a makita ti kinanumo ti aruatek idi naiyabayak kadakuada. Sinutsutildak dagiti kaklaseak ngem namrayak laengen ti nagulimek.

Idi mayawag ti naganko, diak koman umuli iti stage iti bainko ngem immasideg ti maestrak. Isun ti nangkuyog kaniak iti stage ken nangisab-it ti medaliak.

Iti apagdarikmat, rimmaniag ti rupak. Sipapannakkelak a nangapros iti medaliak bayat ti yuulogko iti stage.

Iti dayta a rabii, kilabban ken daing a munamon a nakamatisan ti pinangrabiik. Diak nadatngan ni Nanang Marie iti balay. Mabalin a napan naki-blow-out iti anak ti kaarrubami a padak a nagraduar.

Iti panagmaymaysak, mangegko ti arimbangaw iti pagtaengan dagiti kaklaseak. Madama ti ragragsak. Manen diak nasarkedan iti yaapay ti apalko kadakuada. Inay-ayko manen ti bagik gapu iti agdama a sasaadek iti biag.

Iti dayta a rabii, maysa a pangngeddeng ti nabukel iti panunotko. Pumanawakon iti denna ni Nanang Marie!

(Maituloyto)

Comments are closed.