Footer

Liquidation ti endowment fund ti PCSO, di pirmaan ti provincial engineer

VIGAN CITY – Saan a kayat ti provincial engineer a pirmaan ti liquidation dagiti doktor ti Gabriela Silang General Hospital iti endowment fund ti Philippine Charity Sweepstakes Office gapu iti mapapati a kaawan ti permit to operate ti maysa a parmasia ti kooperatiba iti uneg ti nasao nga ospital.

Ngem iti interbio ni Vice Gov. Jerry Singson bayat ti programana a JCS Kakibin ti Balligi, kinunana a nadakamat ti maysa a doktor ti GSGH a posible a ti makagapu iti di panagpirma ni Provincial Engineer Virgilio Llanes iti liquidationda agsipud iti maysa nga insidente iti ospital a nakainbolbaran ti anak daytoy.

Mapapati a nakaibalikas ni Llanes iti saan a nasayaat kadagiti dodoktor idi awan ti maited nga anti-rabies vaccine iti anakna a nakagat iti aso.

Ngem kinuna ni Singson a ti gobernador ti nangted iti pammalubos iti kooperatiba nga ag-operate iti ospital.

“… Sino ti ibabain daytoy (Llanes)? Ni Gov. Savellano ti nangted iti pammalubos iti pharmacy cooperative nga aggian iti compound ti ospital Apay, saanna a respetaren daydiay? Naki-MOA pay ni gobernador ken dayta a pharmacy cooperative. …Isu a nakarabrabaw dayta pambarna nga awan ti permit to operate (pharmacy cooperative),” kinuna ni Singson bayat ti interbio kenkuana ni Jun Ramos iti nasao a programa iti DWRS.

Kinuna ti bise gobernador a nairanta ti endowment fund manipud iti Philippine Charity Sweepstakes Office para kadagiti marigrigat a pasiente.

“Pondo daytoy para kadagiti indigent… dagiti kakabsattayo nga awan gawayda nga agbayad iti ospital…” kinuna ti bise gobernador idinto nga inyunay-unayna nga iti endowment fund ti paggapuan ti pagbayadda iti ospital.

“No awan ti endowment fund, kasano pay a matulongantayo dagiti narigat ti panagbiagda a pasiente?” kinuna ni Singson.

Segun ken ni Singson, nagpirman amin dagiti kameng ti Bids and Awards Committee iti nasao a liquidation malaksid ni Llanes.

Mainaig iti impatangatang ni Llanes iti maysa a radio station a no adda dakes a mapasamak kenkuana, ti bise gobernador ti mapabasol, kinuna ni Singson a “very dangerous statement” ti imbalikas ti provincial engineer.

“Saanko a maaramid dayta,” kinuna ni Singson idinto nga innayonna a namak payen no adda mapasamak ken ni Llanes, di pay ket isun ti mapabasol idinto nga impalgak ti inhiniero iti napalabas nga adda death threat a maaw-awatna.#