Footer

OPINION: Itan ti gundaway a panagtimek

Makapariribuk unay ti mabasbasa iti inaldaw kadagiti pagiwarnak, mangmangeg iti radio ken mabuya iti telebision dagiti estoria ti panagraira ti korapsion ken panagkunniber kadagiti sanga ti gobierno iti baet ti panangipetteng dagiti agtuturaytayo nga awan ti kinapudnona dagitoy nga alegasion.

Ngem saantayon a mabalin a pagimbubulsekan dagitoy. Saantayo a mabalin a kideman lattan a nagramut dagitoy iti kinapanglaw a manglenglengnges kadagiti umili a patauden ti kaawan ti panggedan, nguminngina a gagatangen, bassit a sueldo ken iti mapalpaliiw a panagabuso dagiti agtuturaytayo.

Makitatayo dagiti nangangato nga agtuturaytayo a di man la agpangadua a kumammet iti pagbagasan ket uray nakadagdagsenen ti bulsada, saanda pay la a mapnek ta ti kayatda, kiraosanda agingga iti tukot.

Makitatayo dagiti agilinlintegtayo a makibibiang iti pannakaipasdek dagiti pagadalan, rangtay, kalsada ken dadduma pay a proyekto a naisangrat a pagimbagan ti kaaduan ngem agtungpal laeng a pagbibingayan dagiti sumagmamano.

Makitatayo dagiti opisial dagiti pagopisinaan ti gobierno nga agsusukot ti luganda, mansion ti pagtaenganda, agbasbasa iti ganggannaet a pagilian dagiti annakda idinto a nababa ti sueldoda kas “adipen ti publiko”.

Dagitoy ti mangdaddadael iti panagtalek dagiti tattao kangrunaan dagiti babassit a masarakan iti kalkalsada ken bangketa dagiti siudad ken il-ili.

Ngem no dadduma, datayo met laeng ti yan ti basol. Agraira dagiti kinadakes gapu ta agul-ulimektayo lattan iti panagabuso dagiti agtuturaytayo. Mabalin a sineknantayo iti amak ken buteng gapu iti kinabilegda maikumpara iti kinabassit ken kinanumotayo.

Agtultuloy ti panagabuso dagiti agtuturaytayo gapu ta iti baet ti mapaliiwtayo a kaawan ti sinseridadda nga agserbi, insublitayo ida iti poder gapu laeng iti sangkapirgis a grasia nga impaarikapda kadatayo iti tiempo ti eleksion. Kinidemantayo dagiti saan a natungtungpal a kari gapu ta ginatangda ti butostayo. Gapu laeng iti apagbiit nga imbag, inlakotayo ti masakbayan ti annaktayo ken daytoy pagiliantayo.

Ita, umasideg manen ti eleksion, kumaribusoda manen a mangiparipirip iti tarigagayda a mangituloy kadagiti “naindaklan a darepdepda” para kadagiti kailianda.

Iti telebision, masansanen a makitatayo ti ladawanda, nakaisem, mangikarkari iti naraniag a masakbayan, mangipatpatalged iti pannakirupakda para kadatayo a babassit nga umili wenno mangipaspasindayag iti dakkel a nagapuananda para iti pannakapasayaat iti biag dagiti tattao.

Nasabsabongan ken natagapulotan dagiti balikasda a mangguyod kadatayo nga agarapaap iti narimrimat a masakbayan ken panagbiag.

Addatayo manen iti nagsangaan ti dalan. Agtuloy kadi lattan nga itanggayatayo ti dakulaptayo tapno makaapirastayo iti “nagtapaya” wenno idir-tayo ti naganda gapu iti kari ti trabaho, nasayaat a puesto ken dadakkel a proyekto para iti barangaytayo? Wenno panawenen a rumkuas ti bosestayo tapno dagiti laeng makabael, maka-Dios ken addaan laeng iti nasin-aw a panggep nga agserbi dagiti maisaad iti poder?

Kailian, itan ti panagtimek ken panagdesisionmo!

Comments are closed.