Footer

Panagaktibo NGO, indagadag ti RANGO

VIGAN CITY – Kasapulan nga aktibo dagiti non- government organizations saan laeng a tunggal miting gapu ta naorganisa dagitoy a tumulong kadagiti agkasapulan. Daytoy ti impaganetget ni Dr. Roberto A. de los Reyes, presidente ti Region I Association of Non-Government Organizations (RANGO) bayat ti Provincial NGO’s Mid-Year Policy Conference nga inangay ti Ilocos Sur League of Civil Societies ken ti opisina ni Gov. Deogracias Victor Savellano.

Iti presentasion ni de los Reyes, sinaggaysana dagiti rumbeng nga aramiden dagiti NGOs tapno matulongan dagiti tattao. Karaman ditoy ti panangsursuroda kadagitoy a tumakder iti bukodda a bagi, nga agurnong ken mangusar iti kuartada iti umno a wagas, maaddaan iti simple ngem komportable a panagbiag, makipartisipar kadagiti aktibidad iti komunidad, kasta met ti pannakasursuroda a mabaliwan ti ugali ken paniriganda iti biag ken mangkita iti masanguanan nga addaan iti namnama.

Kinuna ni de los Reyes a kasapulan a tulongan ti gobierno dagiti tattao a mangtulong iti bagbagida babaen ti panangipasada kadagiti ordinansa ken resolusion ken panangipatungpalda kadagiti poverty alleviation programs.

“Mabalin dagiti NGOs ti makikammayet iti gobierno a mangkita iti alternatibo a wagas tapno malapdan ti panagkurang dagiti kasapulan iti masanguanan a parnuayen ti umad-adu a populasion iti sanguanan ti bassit a produksion,” innayon ni de los Reyes.

Naangay iti kamalmanna ti maysa a workshop session dagiti partisipante a mangibagi iti agrikultura, negosio, mang-mangged, agtutubo, salun-at, edukasion, panangituray, nataengan, aglawlaw, indigenous people, kooperatiba, information and communications technology, pabalay, babbai ken ubbing.

Napagmaymaysa dagiti outputs iti workshop tapno mayaramidan iti action plan.#

Comments are closed.