Footer

SARITA: Nadaraan a Linnaaw (Maika-15 a paset)

“Granada daydiay a!” naiyebkas ni Manolo. Nagkikinnitada nga agkakadua.

“Iti penned ti naggapuan ti kanalbuong!” nakuna ti sabali.

Dua pay a nagsaruno a kanalbuong ti nangpisang iti kaltaang ti parbangon. Nayurit ti apuy iti arsadanan ti bantay, iti pattapattaenda a yan ti penned.

“Dagiti kabusor ti turay! Amangan no rinautda ti nagpunduan dagiti trabahador!” nakuna ti sabali pay a kadua da Manolo.

“Pedro, tumarayka iti police station ta mapantayo umarayat!” imbilin ni Manolo.

“Umayak!” nakuna ni Padre Cristobal. Agparparikna kenkuana a da Palwew ti rimmaut iti yan dagiti trabahador. Ti la ketdi maipatpatakder a penned ti gagarada a pabettaken!

“Saanen, Padre, napeggad!” nakuna ni Manolo. “Cardo, kuyogem ni Padre Cristobal nga agsubli iti Legleg. Kalpasanna, mapanka agpatulong iti kuerpo ti polis sadiay tapno mangibaonda iti reinforcement kadagiti kakaduatayo a polis nga agpa-Ambatan.”

Saanen nga impapilit ni Padre Cristobal ti isusurotna iti bunggoy da Manolo. Napeggad nga agpayso. Iti pattapattana, adda napasamak a nadara a ranget.

Inkararagna a saan koma a da Palwew ti rimmaut iti penned, nupay ibagbaga ti utekna a dagitoy ti akingapuanan dagiti nagsasaruno a napabettak a granada.

“Padre, siguraduek a dagiti kabusor ti turay ti rimmaut iti punduan dagiti trabahador,” nakuna ni Cardo.

“Pagkunaam?” sinaludsod ni Padre Cristobal.

“Sumupsuportada iti panangsupiat da Ama Dalmeg a mapenned ti Karayan Ambatan. Dakkel a perhuisio ti itden daytoy a proyekto ni Mayor Agdamag kadagiti tribu iti Begnas ken Bugnay. Saan laeng a malayus ti pagtaenganda, madalanan pay ti kalsada ti kamposantoda. Sagrado a lugar kadagiti tribu ti nakaitalimengan ti minatayda, Padre.”

Saan a nagtimek ni Padre Cristobal.

“Daytoy ti pagbutbutnganmi a mapasamak, Padre,” immanges iti nauneg ni Cardo, “ti pannakaaron ti riribuk iti kabambantayan. Ah, madaraan dagiti linnaaw iti kaltaang ti rabii!”

“Sapay koma ta saan a pumudno dayta,” naiyebkas ni Padre Cristobal.

“Sapay koma, Padre!” kinuna ni Cardo.

Asidegdan iti sungaban ti ili. Uray pangadaywenda pay, nasaripatpatanda ti nagtagisilaw a dakkel a bunggoy nga agturong iti yanda.

“Depdepem ti silawmo, Padre,” nakuna ni Cardo.

Masmasdaawan ni Padre Cristobal a nagtungpal.

“Padre, ditoy ti pagnaam. Nasaysayaat a manglikawka tapno didaka makita dagiti sumungad. No madanonmo ti igid ti karayan, panurnoremto nga agpaabagatan. Asidegton ti panglintegam a desdes a kumamang iti kapilia,” kinuna ni Cardo.

“Apay?”

“Masinunuok a bunggoy ni Mayor Aguimbag ti sumungad. Mapanda la ketdi iti penned umarayat! Sabali la ketdi ti pagipapananna no makitanaka iti langalang iti kastoy nga oras. Ammomi nga ilunglungalongmo ti pannakaisardeng ti pannakapenned ti Karayan Ambatan.”

“Agyamanak iti panangisakitmo kaniak, kabsat,” nakuna ni Padre Cristobal.

“Addakami iti likudam, Padre. Ngem naulimek laeng ta arig nakapungo ti imami a mangipalnaad iti pudpudno a kaririknami.”

Narikna ni Padre Cristobal ti pisel ni Cardo iti dakulapna sakbay a nagpusipos daytoy ket inalun-onen ti kasipngetan.

Ngem di pay nakaadayo ni Padre Cristobal idi nagbuelta. Nagkul-ob iti puon ti maysa a kayo iti asideg ti dalanen ti bunggoy. Kayatna a penken no asino ti mangidaulo iti bunggoy.

Manipud iti yanna, nalawag a makitana dagiti sumungsungad. Nakaar-ariwawada.

Madamdama, limmabas ti bunggoy iti nagkul-obanna. Nailasinna dagiti nagtagipaltog a badigard ni Mayor Aguimbag iti sango. Ngem awan ti mayor a makitana.

Idi namnamaenna nga adayon ti bunggoy, rimmuar ni Padre Cristobal iti naglemmenganna. Sinurotna ti sumiasi a dalan.

Nasipnget ket uray kasano a panangipilina iti baddekenna, nadalapusna dagiti nagrungarong dagiti bato ket namindua a naidaramudom.

Nagsardeng biit iti igid ti karayan. Nadalus ti pul-oy nga ibelbel-a dagiti kayo a nagtubo iti teppang.

Kellaat, maysa a billit ti umarikiak a timmayab gapu iti pannakabuakna.

Simmalipengpeng ni Padre Cristobal iti puon ti maysa a kayo. Adda sabali a tao!

Nariknana laengen ti natangken a banag a nagdisso iti ulona. Nakusbo iti kabatuan.

(Maigibusto)