Footer

2 babbaro a nagpalpaliwa iti beerhouse, napaltogan, natakawan

SINAIT, Ilocos Sur – Sumagmamano a lawas kalpasan ti panangaprobar ti sangguniang bayan ditoy ti panaglukat manen dagiti beerhouses ditoy nga ili, dua a babbaro a mapapati a kagapgapuda iti maysa a videoke bar iti Barangay Magsaysay ditoy ti napaltogan a puon ti nakayospitalanda.

Sinaed ti maysa a grupo dagiti tattao da Alex Naval, 23, agnaed iti Barangay Dardarat, Cabugao ken ti kaduana a ni Jayson Villanueva, agnaed iti Barangay Salapasap, Cabugao ket inuborda ken pinaltogan dagiti biktima a nakapuntaan ti pispis ni Naval.

Mapapati a pinaturongan pay ti grupo ni Villanueva sada innala ti back pack daytoy a naglaon kadagiti aramientana.

Segun iti report, kagapgapu dagiti dua iti maysa a videoke bar ket nasalamaanda dagiti suspetsa iti asideg ti kalsada nasional.

Mapapati a nakursonadaan ti grupo dagiti biktima.

Naglibas dagiti suspetsa a nakalugan iti dua a motorsiklo ket nagturongda iti amianan a direksion.

Madama ti inbestigasion mainaig iti nasao a pammaltog.

Inaprobaran itay nabiit ti sangguniang bayan ditoy ti ordinansa a mangipalubos iti panag-operate dagiti beerhouses iti baet ti panangkontra ti simbaan dagitoy a pasdek-pagpalpaliwaan.

Maysa a manipesto a pinirmaan dagiti umili a pakairamanan dagiti estudiante, ken dadduma a sektor ditoy nga ili babaen ti panangidaulo ti simbaan a nangkodenaranda iti operasion dagiti videoke bars ken beerhouses a mapapati nga apon ti prostitusion ken puon ti panagraira iti krimen ditoy nga ili.

Saan a naikkan dagitoy beerhouses iti permit nga ag-operate nangrugi itay Enero bayat ti pannakaadal ti manipesto ti simbaan ken dagiti nadumaduma a grupo.

Ngem itay nabiit, maysa nga ordinansa ti naidatag iti sangguniang bayan a mangipalubos ti panaglukat manen dagiti videoke bars ngem adda dagiti safeguards a naipalaon a masapul a surotenda iti operasionda.#