Footer

3 nga ili, pasayakan diversion dam

SUYO, Ilocos Sur – Naluktan itay Hunio 16 ti maysa a diversion dam a mangpasayak iti tallo nga ili iti Ilocos Sur a pakairamanan ti maysa a barangay ditoy nga ili, siam iti Tagudin ken uppat iti Sta. Cruz.

Kinuna ni National Irrigation Administrasion (NIA) head Carlos Salazar a paset ti pannakapasayaat ti Suyo-Tagudin-Sta. Cruz irrigation system iti programa ti opisinada a pannakatutok iti rehabilitasion ken restorasion dagiti saanen nga agkurkurri a sistema ti irigasion iti sibubukel a pagilian tapno umadu ti produksion ti pagay.

Naammuan ken ni Engr. Dominador Mangawang ti NIA a naaramid ti nasao nga irrigation system idi 1922 a panawen ti Amerikano a mangpasayak iti 1,345 ektaria a kataltalonan ket gapu iti kinadaanna, umabot laengen iti 1,236 nga ektaria ti mapadpadanuman daytoy.

Kinuna ni Mangawang a babaen ti pannakaaramid ti 3- phase a diversion dam nga immabot iti P33 milion, umadu dagiti mapasayakan a kataltalonan.

Segun ken ni Salazar, kadawyan a 90 a kaban (4.5 metric tons) ti maap-apit dagiti mannalon iti tunggal ektaria ket kinaritna dagiti mannalon a benepisiario ti naluktan a diversion dam a sayaatenda ti panagtalonda tapno umadu ti maapitda yantangay addan pagtaudan ti kasapulanda a danum..

Inkari pay ni Salazar nga agtultuloy ti panangipaay ti NIA iti kasapulan dagiti mannalon babaen ti naan-anay a suporta dagiti LGUs.

Kabayatanna, impatalged ni House Deputy Speaker Eric Singson a tutokanna ti pannakaipaay ti pondo tapno masemento dagiti kanal ti diversion dam tapno di masayang ti danum ken maproteksionan dagiti taltalon iti posible a pannakakurukorda.

Indagadag ni Gov. Deogracias Victor Savellano nga i-maximize dagiti mannalon ti pannakausar ti irigasion tapno dumakkel ti produksionda.

Inyawat ti gobernador ken ken ni Salazar ti dua a surat a mangkidkiddaw iti pondo para iti rehabilitasion ti Simabusa-Nagbayruangan Irrigation System ti Cabugao ken Burayok ti Pinsal Irrigators Association ti ili a Sta. Maria.#