Footer

Balikatan Exercises, maisayangkat iti Ilocos Sur

CANDON CITY – Impakaammo ti sekretario ti Department of National Defense a maangay inton umay a tawen ti sumaruno a Balikatan Exercises iti Ilocos Sur bayat ti selebrasion ti panagkasangay ni Deputy Speaker Eric Singson a naangay ditoy a siudad idi Hunio 15.

Segun ken ni Defense Secretary Gilberto Teodoro, maangay ti Balikatan Exercises ditoy probinsia inton Abril wenno Mayo inton umay a tawen.

“Ipresentarmi iti Mutual Defense Board dagiti suhestion dagiti opisialyo ditoy tapno maadal no mabalin a mairamanda,” kinuna ti sekretario ti Depensa.

Pinagyamanan met ni Deputy National Security Adviser Luis “Chavit” Singson ti panangiyendorso ni Teodoro iti Ilocos Sur a pakaangayan ti Balikatan kagiddan ti panangibagana a dakkel ti maaramidan daytoy iti pannakaingato ti kalidad ti ekonomia ditoy.

Kabayatanna, pinasingkedan ni Teodoro a matuloy ti eleksion inton umay a tawen iti laksid ti adu nga ispekulasion nga awan ti maangay a panagbubutos. Nupay kasta, kinunana nga awan iti posision nga agsarita mainaig iti damag a panagtaray ni Pres. Gloria Macapagal-Arroyo a kongresista iti Pampanga.

“Awan pay met ti deklarasionna. Urayentayo nga aggapu a mismo kenkuana,” kinuna ni Teodoro.

Mainaig iti Solid North a grupo dagiti kongresista iti Amianan, kinuna ti sekretario a rumbeng nga agtultuloy daytoy saan laeng a para iti politika no di pay para iti kultura ken turismo.

Kinuna ti Defense secretary a dakkel ti maaramidan ti kaadda daytoy a grupo tapno nadardaras nga agbalin ti Amianan kas prime tourism and industrial destination iti pagilian.#