Footer

EDITORIAL: Dinto agpatingga dagiti trahedia agingga ti ditayo agbalbaliw

Saan nga aggibus ti trahedia iti baybay no addanto pay laeng dagiti agaramid iti maikaniwas iti linteg, dagiti aginkikidem a mata, dagiti bukatot iti pirak ken no saan nga italtalek dagiti pagalagadan iti panagkargaan iti pasahero. Kas iti panagkarga iti nalablabes ngem iti naituding a pasahero a nagbalinen a naynay wenno gagangay laengen a mapasamak.

Kadagiti napasamak a trahedia iti baybay, kas iti pannakapattog ti inter-island ferry a Commando 6, saan a nasurot ti reglamento a kargaenna a bilang dagiti pasahero. Nagsobsobra ti bilangda. Naggapu daytoy iti Batangas, ket agturong iti Puerto Galera idi mapattog iti asideg ti Mindoro. Adda pay turista nga Hapones a nairaman kadagiti 12 a natay idinto a 48 dagiti nakalasat. Rumbeng a 48 laeng koma ti bilang dagiti pasahero, agraman ti skipper ken dagiti tripulante.

Maliklikan koma ti kastoy a trahedia no istrikto a maipatungpal dagiti reglamento. Sakbay nga agrubuat ti lugan, mabilang koma a nalaing no mano dagiti nakalugan. Saan a mabalin a sobraan ta dayta ti nairanta a makarga ti lugan. Rumbeng laeng a bumaba dagiti naudi a limmugan. Wenno nasaysayaat pay a matsek-ap dagiti pasahero iti iluluganda tapno maammuan a dagus ti bilangda agraman dagiti tripulante.

Manamnama ti isasangbay ti dakes a panawen iti pagiliantayo a buklen ti nasurok pito ribu nga isla. Daytoy ti kangrunaan a saganaan tapno maiyadayo iti trahedia. Nasken a mataripato a nasayaat ti kasasaad ti lugan.

Masapul a kompleto ti bilang dagiti life jackets ken dadduma a kasapulan sakbay nga aglayag. Saan nga ipapan nga uray ta nasirnaat met ti panawen, awan ti trahedia a mapasamak. Dumteng ti trahedia iti aniaman a panawen. Ngem ketdi, sigurado a maliklikan ti trahedia babaen ti panangsurot iti umno ken maiparbeng nga aramiden a kas intuyang ti pagalagadan ti industria.

Ti rigatna, nakairuamanen ti panagkarga iti mapumpunno ken agsobsobra. Naipaugalin a saan nga italtalek dagiti reglamento ken alagaden iti panagkarga kadagiti pasahero saan la a dagiti lugan iti danum no di pay iti takdang.

Ti sobra a kinabukatot iti pirak ti kangrunaan a rason no apay a saan nga istrikto iti pannakayimplimentar dagitoy nga alagaden. Sobra ti kinaamengtayo. Ti ad-adu a mateggedan ken sagrapentayo nga imbag ti panunotentayo.

Agingga iti saan nga agbaliw dagitoy a panunottayo, pulos a dinto sumardeng ti trahedia iti baybay. Saan a malibak nga ad-adda ketdi nga immadu ti bilangna, iti laksid ti kinaadda ti kabarbaro a teknolohia a maar-aramat kadagiti sasakyan ken iti panaglayag. Adda ken addanto latta dagiti trahedia agsipud iti panagbaybay-atayo kadagiti alagaden ken pagrebbengan.

Awan ti umuna a babawi no di maudi. Agnanayon a maudi. Nalpaston ti amin, napasamakton ti pagteng a saan a naimbag, satayo agtitinnudo no sino ti nagliway ken nakabasol. (JMAJR)

Comments are closed.