Footer

Narsuod a seawall iti Santa, maiyur-urayen pondona

CANDON CITY – Impakaammo ti district engineer iti maikadua a distrito ti probinsia a maiyur-urayen ti pondo para iti pannakasimpa ti narsuod a kalsada ken seawall a sakup ti Santa, Ilocos Sur.

Kinuna ni Engr. Ray Elaydo, district engineer ti 2nd Engineering District nga idi narba ti nasao a seawall kalpasan ti bagyo, adda instruksion ni Cong. Eric Singson a maidatag ti program of work para iti pannakasimpana ket ita, addan pondona.

Naammuan nga aganay a P50 milion ti nakaprograma a kasapulan a pondo para iti seawall ket yur-urayda ti inisial a maruk-atan a pondo nga aggatad iti P25 milion.

Kinuna ni Elaydo a menteneranda pay laeng ti detour road bayat ti panangurayda iti isasangpet ti nasao a pondo.

Kabayatanna, agtultuloy ti kinaginad ti pannagna ti trapiko kadagiti nadumaduma a paset ti maikadua a distrito gapu kadagiti masimsimpa a kalsada a pakairamanan ti kalsada a sakup ti Tagudin, Santa Cruz, Santa Lucia, Candon, Santiago, San Esteban, Santa Maria, Narvacan ken Santa.

Nagsagrap ti DPWH kadagiti pammabalaw gapu iti perhuisio nga ipapaay dagitoy masimsimpa a kalsada kadagiti agbibiahe a pakaibilangan dagiti mangisursuro, estudiante, negosiante ken dadduma pay a biahero.

Segun iti maysa a commuter, naginad unay ti pannakaitrabaho dagiti kalsada.

Ngem inkalintegan ni Elaydo a nataktak ti pannakasimpa dagiti kalsada gapu iti panagtudotudona.

“Mataktaktayo bassit ta ditayo met makapagtrabaho no agtudtudo ta madadael ti pannakabase ti masimsimpa a kalsada,” kinuna ni Elaydo.#

Comments are closed.