Footer

NDAYON NI LAGIP: Dagiti Piglat iti Biagko (Tuloyna)

SIMMARUNO a naggianak ni Nanang Carling. Nasarakannak ni Nanang Carling nga agallaalla iti kalsada ket naasian siguro kaniak ta inyawidnak. Nagmayatak ta kasla nadungngo ti rupana ken mabutengak a maturog lattan iti bangketa, iti denna dagiti agpalpalimos ken dadduma pay nga ubbing iti kalkalsada.

Ngem nagbiddutak iti panangipagarupko ken ni Nanang Carling. Awan met gayam ti pakaidumaanna ken ni Nanang Marie. Bassit laeng a biddutko, kuddot wenno baut ti sagrapek kenkuana. Nupay kasta, uray no dusaennak, inanusak ta pakanennak latta ken inkarina a pagadalennak.

Iti dayta a panagseserrek, inyenrolnak ni Nanang Carling iti pagadalan publiko. Naragsakannak ta maituloyko met laeng ti panagbasak. Uray kasla taraken ti panangtratar kaniak ni Nanang Carling, nagan-anusak. Uray naganus pay ti panunotko, ammok a babaen laeng iti kaadda iti adalko a makaalut-otak iti agdama a kasasaadko.

Ngem adda latta pagpatinggaan ti kinaanus, Manong Danny. Nagramut daytoy iti maysa a pasamak iti bulan ti Disiembre.

Binaonnak ni Nanang Carling a gumatang iti bugguong. Inikkannak iti nabukel a singkuenta ta awan ti sensiliona. Ngem idi addaak iti dalanko, adda nangdungpar ken nangtapis kaniak. Dagiti palabuylaboy nga ubbing. Masansan dagitoy a nakaistambay iti asideg ti pagigiananmi.

“Itedmo kaniami ta kuartam no dimo kayat ti masaktan,” uray la nagbukilad ti mata ti burangen a pannakapanguloda.

“Mandiak. Ungtannak la ketdi ni Nanang Carling!” nakunak.

“Ne, nagtangsitkan!” kinuna ti burangen. Kellaat, kinugtarannak ket uray la naidaramudomak. Ginammatan ni burangen ti petpetko a kuarta sada nagtataray nga agkatkatawa.

Agsangsangitak a naggawid. Imbagak ti napasamak ken ni Nanang Carling. Ngem baliktad, siak ketdin ti nagpupungtotanna. Nangala iti bislak ket nagsasarunon dagiti ablat iti patong ken kutitko. Uray la limmitlitem dagiti binatlag kadagitoy a paset ti bagik.

Idi diakon makaibtur, nagtarayakon nga immadayo. Maymaysa ti adda iti panunotko, ti makaadayoak ken ni Nanang Carling. Makadayoak iti pannusana.

Saak la nagsardeng idi kasta unayen ti kapsutko. Diak ammon ti yanko. Nagtugawak iti bangketa ta maul-ulawak. Diakon napuotan dagiti simmaruno a napasamak.

Idi imulagatko ti matak, addaakon iti ospital.

“Ania ti marikriknam?” sinaludsod ti nars.

“Maul-ulawak,” nakunak.

Pinilitko ti bimmangon ngem dinak pinalubosan ti nars. Pinagtomarnak.

Naammuak nga intaraynak ti maysa a baket iti ospital. Virginia Alasaas ti naganna. Nasarakannak kano a nakadalutaytay iti bangketa.

(Adda tuloyna)