Footer

OFW Love Links, inyussuat ti Vigan city government

VIGAN CITY – Tapno makatulong iti pannakatagiben iti panagpipinnateg dagiti overseas workers ken dagiti pamiliada ditoy siudad, nangipasdek ti city government itay nabiit iti pasilidad ti komunikasion babaen ti internet.

Naawagan iti “OFW Love Links”, pakpakauna a naipasdek iti pito a barangay ditoy siudad dagiti computer units a nairanta a pakipatangan ti pamilia iti patpatgenda nga agtrabtrabaho iti sabali a pagilian.

Kinuna ni Mayor Eva Marie S. Medina nga iti panangidagadag ti Overseas Workers Welfare Administration, nabuangay dagiti overseas family circles kadagiti nadumaduma a barangay ket kalpasan ti panagmaymaysada iti babaen ti maysa a pederasion, naipasdek ti “OFW Love Links” no sadino a mabalin a makapatang ti overseas worker ti patpatgenna ken annakna babaen ti internet.

Segun iti mayora, sangapulo ket tallo a barangay ti nangilungalonganda a pakaipasdekan dagiti internet ngem 7 a barangay laeng ti nagresponde ngem kalpasan a nakita dagiti opisial ti kinapateg ti nasao a programa, impeksadan ti tarigagayda a maka-avail iti pasilidad ti internet iti barangayda.

Babaen ti nasao a pasilidad, makapatang ti OFW dagiti patpatgenda ken makapagkikinnitada pay ta adda naikabil a webcam iti computer ket saandan a mapan pay iti uneg ti siudad tapno laeng makapagiinniliwda.

“Ammotayo met no kasano ti rigatna a ti ay-ayatem, ti anakmo, ti asawam, adda iti ballasiw-taaw, dimo makapatpatang, dimo ammo ti kasasaadda…” kinuna ni Medina idinto nga inyunay-unayna ti kinapateg ti nasao a pasilidad ta babaen ti panagpatangda iti internet, mapunas ti iliw ti OFW iti pamiliana, kasta met a maikkan iti gundaway a mangbayabay iti annakna iti nasayaat a sursuro uray iti babaen laeng ti internet ken kaawanna iti denna dagitoy.

Kinuna ni Medina a sabali pay a panggep ti nasao a programa ti pannakapataud iti pagsapulan dagiti pamilia ti OFW kas iti panagawatda iti typing ken printing jobs kas iti inbitasion ken sertipiko, panagpaupada kadagiti ubbing nga agay-ayam kalpasan ti klaseda, ken panangipausar iti internet iti per hour basis.

“In the long run, daydiay mapastrekda ti pangalaanda iti pagbayadda iti internet provided ken makalibreda iti pannakipatangda iti patpatgenda iti abroad,” kinuna ni Medina.#