Footer

OPINION: Sueldo, saan nga honorarium maited koma kada kapitan ken kagawad

Nasursurok pay ngem full time ti panagtrabaho da Kap ken kagawad. Uray tengnga ti rabii, no adda mapan agpaarayat a kalugaranda, kapilitan a bumangonda tapno mapanda risuten no ania ti problema. No adda programa wenno proyekto da apo mayor wenno gobernador, isuda ti umuna a maayaban a mangimplimentar kadagiti bukodda a lugar.

Ti problema, di pay ket ngata madlaw ida uray no 24/7 ti trabahoda. Bale awan, wenno ti kadaksan, di makita dagitoy dagiti agtuturay wenno kalugaranda. Pasaray dida pay maikkan iti komendasion kadagiti inaramidda a pagsayaatan ken pakaitan-okan ti barangay.

No utoben a nalaing, adu ken dakkel ti responsibilad ni kapitan ken dagiti kagawadna. Kaasida a bumalballaet iti apa ken susik ti pamilia, agkakabagian, agkakaarruba, wenno ania ditan a parikut iti barangay. Ala ket, mangnamnamada laeng iti honorariumda. Mano met laengen aya ti honorariumda?

Panawen metten a maikkan ida iti sueldoda. Panawenen ti panagaramid dagiti agilinlintegtayo iti kabarbaro a paglintegan ken annuroten iti panagtakemda. Nasken nga umawatda metten iti sueldo, saan la nga honorarium. Tapno nagaggagetda pay nga agserbi iti barangay. No adda sueldoda, adda taringguyodda nga agtrabaho tapno awan ti maisao ken maibabalaw dagiti kalugaranda. Awanton ti pinnatudon nga aggunay no adda pakarikutan.

Ti honorarium da kap ken dagiti kagawad ket agtaud a mismo iti Internal Revenue Allotment. Kadagiti nasulinek a lugar, basbassit ti maiyalokar kadakuada. Kayatna a sawen, saan a patas ken padapada ti panagnomar iti karbengan. Rumbeng koma a maited kadakuada ti umiso a karbenganda a kas mangririenda iti barangay. Naikadakkel manen ti sueldo ken benepisio kadagiti empleado ken agserserbi kadagiti sabali a sanga ti gobierno ngem agingga iti agdama, nalipatan ken naipaspasuli latta da kap ken da kagawad.

Iti baet ti kinabassit ti aw-awatenda, adu met ti paggastosan da kap ken dagiti kagawad. No adda bisita a VIP, isuda piman ti maturtoran nga agsangaili.

Iti panawen ti didigra ken kalamidad, frontline wenno isuda ti kangrunaan ken maturtoran nga agtignay para iti sibubukel a barangay. Isuda ti kangrunaan a mangkita iti pannakaideliber dagiti basic services iti masakupanda. No dadduma, ti kinaawan wenno kinakurang ti resourcesda ti dakkel a lapped iti pannakaiwayat wenno pannakaipatungpal dagiti napipintas a gannuatda para iti pagsayaatan ti barangayda.

Kadagiti dadduma, gapu iti kaawan ti pondo, kaarigda ti napungo nga awan ti mabalinanda nga aramiden tapno masolbar dagiti parikut ken problema iti barangayda. Masansan a malipitda ket agpannurayda iti tulong wenno donasion manipud iti nangatngato a turayen. Kapilitan nga umagepda iti dapan ni politiko. Agtungpalton nga iggem ni politiko ti kinarakaranna. No dadduma, ditoy a sumrek ti saan a nasayaat a banag wenno pakapanunotanda nga agaramid iti maikaniwas.

Mababalawtayo ngarud ida no agtignayda nga unaen dagiti banag a para iti bukodda a pamilia, iti bukodda a panggep ngem iti awag ti serbisio?

Isu a panawenen a mabalbaliwan ti linteg tapno maited kadagiti kapitan ken dagiti kagawad ti patas a benepisio a kas iti aw-awaten dagiti padada nga agtuturay. Yantangay isuda iti kangrunaan a maturong dagiti bumarangay no adda problemada, rumbeng laeng a yawat ti responsibilidad kadakuada nga addaan iti katukadna wenno namnamaenda a para iti pamiliada.

Panawenen a kitaen dagiti agar-aramid iti linteg iti pagsayaatan dagiti opisial ti barangay. No narang-ay ti kababaan a unit ti gobierno, sibubukel a gobierno iti agrang-ay.#

Comments are closed.