Footer

SARITA: Nadaraan a Linnaaw (Maudi a paset)

Nagmulagat ni Padre Cristobal. Naparupanget idi bumangon ta nakarikna iti sakit iti likud ti ulona. Inaprosanna ti ulona. Adda nagbalay a dara iti buokna.

Inwarasna ti panagkitana. Nailet a siled ti yanna. Malaksid iti papag a nagiddaanna, awanen ti makita iti siled. Nangato ti bugbugtong a bassit a tawa. Nasipnget pay iti ruar. No ania ti oras, dinan ammo.

Bimmangon ni Padre Cristobal idi makaalingag iti timek manipud iti ruar. Tinurongna ti kayo a rikep ti kuarto. Nakabalunet iti ruar.

Nalettat ti balunet. Tallo a nakapatig a soldado a nakaarmas ti simrek iti siled.

“Nakapuotka gayamen, Padre,” kinuna ti pannakapanguloda. “Siak ni Sgt. de Castro. ”

“Sadino ti yanko, sarhento?” inamad ni Padre Cristobal.

“Addaka iti safehousemi. No sadino, sekreto daytoyen, Padre.”

“Apay nga inyegdak ditoy?”

“Nasalamaandaka dagiti soldadok iti langalang iti pay met pannakaraut ken pannakarebba ti maar-aramid a penned. Adu dagiti kayatmi a saludsoden kenka, Padre Cristobal.”

“Awan ti ammok iti pannakarebba ti penned, sarhento. Naggapuak iti Begnas, iti massayag ni Ama Dalmeg. Aggawidak koman iti kapilia ta isaganak ti panagmisak….”

“Suspetsami a kaduadaka dagiti rimmaut, Padre. Maibatay iti panagimbestigami, supsuportaram ti pannakaisardeng ti pannakaipatakder ti penned.”

“Kalintegan dagiti taga-Begnas ti itaktakderko, sarhento.”

“Ala, dita pagsupiatan dayta, Padre. Kayatko laeng nga ibaga nga adda bilinmi nga agsukimat iti uneg ti kapiliam. Idiay kano ti pakaiwarwarasan dagiti subersibo a dukomento.”

“Pammarpardaya dayta, sarhento,” nagsibo ti dara ni Padre Cristobal. “Sagrado a disso ti simbaan. Diak maipalubos a basakbasaken ti sinoman.”

“Adda naalami a search warrant, Padre. Urayek ti resulta ti panagsukisokda. Dandani itan dagiti binaonko.”

Kasla napaksuyan ni Padre Cristobal a nangipusot iti bagina iti papag. Kasano a suspetsaen dagiti soldado a kumankannigid?

Nakangegda iti arimbangaw iti ruar. Sa dagiti danapeg nga agturong iti yanda. Simrek ti dua a soldado. Adda bakruyda a langgusti.

Kinissiiman ti maysa ti sarhento idinto nga inruar ti sabali ti naguneg ti langgusti. Liblibro ken dokdokumento.

Sinango ti sarhento ni Padre Cristobal. “Ammom no ania ti nasarakanda, Padre?” kinunana. “Subersibo a liblibro, dukomento ken listaan dagiti tumultulong iti tignay a maikontra ti turay. Nakalista ti naganmo!”

“Saan a pudno dayta!” nagtigerger ti timek ni Padre Cristobal. “Diak kukua dagita!”

“Iti kampo ti pagpalawagam!”

Naglulok ti tumeng ni Padre Cristobal. Nadagsen dagiti pammaneknek a maibusor kenkuana. Malungsot la ketdi iti pagbaludan!

Kellaat, nakangegda kadagiti ranipak dagiti paltog iti ruar. Nagkul-ob ni Padre Cristobal iti sirok ti papag. Nagpaliiw.

Nagsasaruno dagiti danapeg iti ruar. Madamdama, gimluong ti timek.

“Salhento, naalikubkobkayo kadagiti taok. Palualenyo ni Padle Clistobal tapno awan ti maibuyat a dala!”

“Palwew!” nayesngaw ni Padre Cristobal.

“Wen, Padle, umaydaka isalakan, kinuna ni Palwew. “Sumulotkan kadakami. “Masapuldaka. Makilupaktayo!”

“Palwew, dakkel a biddut ti aramidem!”

“Saan, Padle. Awanen ti panagtalekko kadagiti agtutulay. Linukelda amin!”

“Idissom ti armasmo, Palwew. Nabulsekanka laeng.”

“Naisaluagen ti iket, Padle. Linebban dagiti kaduak ti penned! An-anupenda metten ni Mayol Aguimbag. Sadino man ti naglemmenganna, makamatanto ti hustisiami.”

“Dimo denggen ida, Padre,” insalingbat ti sarhento. “No sumurotka, ad-adda laeng a dumagsen ti kasom.”

“Tagtagali!” imbugtak ni Palwew.

“Adda sumungad!” impukkaw ti maysa a kadua ni Palwew. “Sangapangen a soldado!”

“Ania ti pangngeddengmo, Padle?” sinaludsod ni Palwew.

“Dika sumurot, Padre Cristobal!” kinuna ni Sarhento de Castro.

Immanges ni Padre Cristobal iti nauneg. No sumurot, anupento ti linteg. Ngem di matmaturog ti Dios. Lumtuadto ti pudno.

“Ladingitek, sarhento,” kinunana. “Kasapulandak da Palwew. Saanda a napeklan a dakes. Biktimada laeng dagiti pasamak. Allukoyek ida a sumukoda iti turay.”

Rimmuar ni Padre Cristobal. Inbalunet ni Palwew ti ridaw.

Sinarukusokda ti kasipngetan. Iti tangatang, mangrugin a kumusnaw ti lawag dagiti bituen iti dandanin pannakaipasngay ti agsapa.#

Comments are closed.