Footer

SIDEBAR: Beerhouses iti Sinait, Ilocos Sur, at-atiddog itan ti operasionda

SINAIT, Ilocos Sur – Nagkirem ti sangguniang bayan ditoy iti sanguanan ti mapapati a pressure manipud kadagiti agtagikua kadagiti beerhouses nga ag-operateda manen.

Inaprobaran itay nabiit ti sangguniang bayan ti ordinansa nga impila ni Konsehal Fortunato Ines a mangipalubos iti panaglukat manen dagiti beerhouses ken ag-operate iti at-atiddog a tiempo ngem adda dagiti safeguards a maiwayat tapno saanda nga agbalin nga “apon ti prostitusion” ken puon ti panagraira ti kriminalidad ditoy nga ili.

Sagudayen iti ordinansa nga ag-operate dagiti beerhouses manipud iti alas siete ti rabii agingga iti alas tres iti parbangon ken adda guard a mangited iti seguridad kadagitoy a pasdek-paglinglingayan.

Mapalubosan dagiti GRO nga ag-entertain kadagiti parokiano ngem kasapulan a mangalada iti birth certificate a mangpaneknek a saanda a menor de edad ken mangisuotda iti health certificate ID tapno masiguro a nasalun-atda. Obligado pay dagiti GRO nga agpa-smear test iti linawas tapno maammuan nga awan sakitda.

Sagudayen ti ordinansa a maidatag ti bilang dagiti GRO kada beerhouse iti rural health unit ken iti opisina ti mayor.

Agmulta dagiti beerhouses a masukalan a naglabsing iti ordinansa.

Maibilang a maysa a disnog ti pannakaaprobar ti panag-operate manen dagiti beerhouses iti tignay ti simbaan a mangpasardeng iti operasion dagiti beerhouses ditoy nga ili kas sinaguday iti manipesto a pinirmaan dagiti bumarangay, estudiante ken dadduma pay a grupo babaen ti panangidaulo ti simbaan.

Kinondenar ti simbaan ti operasion dagiti videoke bars a kunana a puon ti panagraira ti prostitusion ken kriminalidad ditoy nga ili.

Temporario a napasardeng ti operasion dagitoy a beerhouses bayat ti pannakaadalna no kasapulan a mapasardeng dagitoy iti sanguanan ti alegasion nga aponda ti prostitusion.#

Comments are closed.