Footer

TARAON TI PANUNOT: Pagbaludan ni Ayat

Awan ngatan ti kasasaeman a pasamak iti biag ti maysa a tao no di ti pannakabaludna iti manangikulbo nga ayat. Malaksid a nakabaklay iti nadagsen a krus, pusona pay ti nakana a masugatan, riknana ti masaktan, madadael pay ti kinataona.

Ngem kalpasan a makaruk-at iti pagbaludan ni ayat, sumangbay kenkuana ti baro a biag. Masursurona ti tumakder iti bukodna a saka. Masursurona a subaen dagiti dadakkel ken babassit a dalluyon ti biag. Ken kangrunaanna, maluktan ti isipna iti kinapudno.

Kas iti pakasaritaan ni Joyce, balasang a nabalud iti maiparit nga ayat. Iti baet nga ammona nga adda asawa ni Edgar, nakirelasion latta ni Joyce kenkuana.

Binagbagaan ni Mariel, nasinged a pagayam ni Joyce, ti pannakirelasion ti gayyemna iti addaan asawa. Nupay impapilit ni Joyce a naragsak iti sinerrekna a biag, saan a namingga ni Mariel a nangted iti suporta ken pammagbaga ken ni Joyce.

Naanakan ni Edgar ni Joyce. Maysa a lalaki. Idi agbasan, inyenrolna iti pribado nga eskuelaan. Ngem saan nga inawat ti eskuelaan ti anak ni Joyce agsipud ta dita met ti pages-eskuelaan dagiti annak ti lalaki a nangkabit kenkuana. Siempre, liklikan ti eskuelaan ti eskandalo.

Ken ni Mariel, dimtengen ti pannubok a nasken a sanguen ti gayyemna. Imballakadna a nasken nga agtignay a dagus ti gayyemna sakbay a magabay ti amin.

Kinunana a no kayat ni Joyce a mabalbaliwan ti panagbiagna, nasken nga agikeddeng. Nasken a makiwinnaswasen iti lalaki ket agbiag a siwawaya. Nupay narigat nga akuen ti agdadata a kinapudno, nasken nga agikeddeng nupay nakasaksakit daytoy nga aramidenna.

Pinapigsa ni Mariel ti pakinakem ni Joyce nga iti damo, narigat nga aramiden. Ngem adda iti ruangan ti wayawaya ket saan a rumbeng nga agsubli pay. Masapul nga ituloytuloynan nga aramiden.

Pimmanaw dagiti agina iti lugarda. Tapno mangabaruananda iti sabali a lugar. Tapno agbiagda nga agina, nasken nga unnaten ni Joyce dagiti takiag ken tultulangna.

Nangipatakder iti karinderia. Gapu ta naimas dagiti lutona, adu dagiti kustomerna. Maysa kadagitoy ni Noel. Nagrayo ti baro kenkuana. Impudno ni Joyce ti napalabasna. Awan ti inlimedna. Naawatan ni Noel. Iti laksid ti kaadda iti nalidem a napalabas ni Joyce, saan a nagbaliw ti panagayat ni Noel kenkuana.

Iti panagkallaysa da Noel ken Joyce, maysa kadagiti karagsakan ni Mariel a gayyemna.

Saan nga agpatingga wenno awan ti patinggana ti asi ti Namarsua. Itedna daytoy kadagiti amin a parsuana, lalo kadagiti mangabaruanan. Uray saanda a dawaten, dumteng ket dumteng ti grasiana kadagiti mangabaruanan.

Saan a maibalud ti tao iti manangikulbo nga ayat no ammona la ketdi a suroten ken ikkan iti importansia dagiti bambanag a pagayatan ti Namarsua.

Saan nga agnanayon a nakuyem ti tangatang, sumirnaatto a napnuan rayray.#