Footer

80 Army reservists, nadeputized kas fish wardens

CABUGAO, Ilocos Sur – Walopulo nga Army reservists a kameng ti Ready Reserved Batalion 102nd ILS, CDC, ARESCOM iti Bulag, Bantay ti nagturpos a kas fish wardens kalpasan ti tallo nga aldaw a training nga insayangkat ti Provincial Agriculture Office ken Bureau of Fisheries and Aquatic Resources Region I a naangay ditoy nga ili itay nabiit.

Iti panagsarita ni Col. Amado Tejano, Batallion Commander ti Reserved Command, kinunana a pakaragsakan ti grupona ti tumulong iti pannakasaluad ti kabaybayan ti probinsia.

“Maysa a gagem ti Reserved Command ti mangsuporta kadagiti programa ti LGU iti socio-economic development ti probinsia,” kinuna ni Tejano.

Kabayatanna, nagyaman ni Gov. Deogracias Victor Savellano kadagiti reservists gapu ta nayatda a dimmalan iti nadakamat a panagsanay.

“Sapay koma ta saan laeng nga agpatingga iti panagsanay ti reggetyo. Ipakatyo koma ti amin a naadalyo para iti pagsayaatan ti kaaduan,” kinuna ti gobernador.

Kinarit pay ni Savellano dagiti baro a fish wardens a mangtiliw kadagiti agar-aramid iti dinamita ken dadduma pay nga illegal a klase ti pagkalap.

“Ikkan ti gobierno probinsial iti P5,000 kas insentibo ti asinoman a makaitudo kadagiti agar-aramid iti maikaniwas apaman a matiliw dagiti naglabsing,” kinuna ti gobernador.

Innayon ti gobernador a panawen metten a kitaen dagiti kaprobinsiaan ti posibilidad ti panagnegosio iti baybay kas iti panagtaripato iti ruot-baybay a eucoma ken caragina.

Linagidaw ni Savellano ti saan a pannakaitaltalek dagitoy iti Kailokuan iti laksid a multi-milion nga industria daytoy iti Mindanao.

Manamnama a maaddaan pay iti sumaruno a batch ti reservists nga agdalan iti umasping a panagsanay.

Kalpasan ti programa, nangisayangkat dagiti nagturpos a reservists iti panagdalus iti igid ti baybay ti Brgy. Pug-os.#