Footer

Dagiti masapul a maammuan maipanggep iti Influenza A(H1N1)

Umad-adu dagiti agsakit iti swine flu virus wenno Influenza A H1N1 ditoy pagilian. Ditoyen pagiliantayo ti kaaduan iti kaso dagiti nagsakit iti daytoy a virus iti sibubukel nga Asia.Iti pannakaisurat daytoy, addan nasurok a 400 a kumpirmado a kaso ti nagsakit iti A H1N1. Pagsayaatanna, awan pay laeng ti kompirmado a natay a kailiantayo.

Adu dagiti agwarwaras a damag a lalo laeng a mangited iti pannakariribuk kadagiti kailiantayo. Saantayo koma a patien dagitoy. Kaadduanna kadagitoy ti parnuay laeng dagiti awan maaramidanna. Mangloklokoda laeng babaen ti text messages wenno ania ditan a behikulo ti impormasion. Saan a makatulong dagitoy no di ad-adda ketdi a degdeganda ti panagpanic dagiti tattao.

Agpayso, kabarbaro la unay a sakit daytoy ken saan a gagangay nupay addan dagiti kaaspingna a sakit kadagiti napalpalabas a tawen. Ngem saan a kas iti panangipagarup dagiti adu a tattao a nadagsen daytoy a sakit. Saan a kas kadagiti dadduma a sakit a nadaras a makapatay.

(Inreport ti DOH itay Hunio 22 a maysa a babai nga agtawen iti 49 ti natay iti A(H1N1). Ngem kuna ti DOH nga adda pay sabali a sakit ti biktima a posible a nakagapu iti ipapatayna. -Ed.)

Kinapudnona, kinuna ti Department of Health nga ad-adda a makapatay ti dengue ngem ti A H1N1. Kasapulan laeng ti panagdaldalus iti bagi, iti arubayan ken aglawlaw.

Tapno sigsigurado, intay kitaen ti advisory manipud ti Departamento ti Salun-at. Masapul nga ammuen ti publiko maipapan ti Influenza A(H1N1) tapno dida mamatpati kadagiti damagdamag nga awan ti kinaagpaysona.

Daytoy A(H1N1) ket maysa nga influenza virus a mangpatpataud iti sakit kadagiti tattao. Idi damdamo, naawagan iti swine flu agsipud ta iti naangay a panagamiris iti laboratorio, naduktalan a kaasping daytoy dagiti influenza viruses a normal a nagtaud kadagiti baboy iti North America. Ngem kadagiti sumagsaganad a panagadal, naduktalan a sabali daytoy baro a virus kadagiti agsirsirkulo a virus kadagiti baboy iti North America. Addaan daytoy iti dua a genes manipud kadagiti viruses nga agsirsirkulo kadagiti baboy iti Europa ken Asia kasta met iti avian genes ken human genes.

Kabarbaro la unay daytoy a sakit ta idi laeng Abril 2009 a natakuatan sadiay USA. Ngem ketdi, ad-adda a nagsagaba ti pagilian ti Mexico. Adda met naireport a kaso kadagiti sumagmano a nasion, a pakaibilangan toy pagilian.

Daytoy a virus ket maiwaras babaen ti person-to-person a kas iti gagangay a panateng. Isu ngarud a maibalakad ti panaginana pay laeng dagiti kasangsangpet a kailiantayo manipud ballasiw-taaw iti pagtaenganda iti sumagmano nga aldaw sadanto gesdan ti agpasiar. Nupay maibilang a fatal, adda met dagiti medisina nga epektibo kalpasan ti konsultasion kadagiti autoridad iti salun-at.

Kas met laeng iti gagangay a panateng ken gurigor dagiti senial ken sintoma ti A(H1N1) kas iti panaggurigor, sakit ti ulo, panagkakapsut, nasakit a masmasel ken susuop, awanan iti ganas a mangan, aguyek, agsakit a karabukob ken letleten nga agong.

Maibilang a mitolohia wenno sarsarita laeng a maakaran ti tao babaen ti pannanganna iti karne ti baboy. Awan ti kinapudnona dayta. Ti husto, maakaran ti tao iti panagbaen ti agsakit iti A(H1N1). Maakaran met ti tao iti panagiggem kadagiti bambanag nga iniggaman ti agsagsagaba itoy a sakit.

Ti kasayaatan amin, abbongan ti agong ken ngiwat no agbaen ken aguyek. Kanayonen ti panagbuggo ti ima. No agusar iti sanitizer, masapul a daytoy ket alcohol- based. Kumayakay no adda agsakit. Masapul a mapapigsa a kanayon ti resistensia ti bagi babaen ti kasapulan nga inana a 8 nga oras a turog. Masapul ti gaganaygayan ket pukawen ken iliwag no adda man pakabantotan. Uminum iti adu a danum ken mangan kadagiti prutas ken nutritious a makmakan.

Ania ti aramiden no adda agsakit iti uneg ti pagtaengan? Ipadoktor a dagus. Masapul a maisalumina; ngem no saan, masapul a maiyadayo wenno adaywan iti maysa a metro. Agaramat iti surgical mask wenno abbong no awiten wenno bayabayen ti masakit. No naidekket ima iti masakit, kasapulan ti panagbuggo kalpasanna.

Tapno daras a maimbagan ti masakit, kasapulanna ti naan-anay nga angin. Ken kasapulan unay ti panagdalus.

Ti kinadalus ken kinaannad, napimpimtas nga amang ngem ti sinaksako nga agas.#

Comments are closed.