Footer

EDITORIAL: Ti Makapadukem a Projection ti DoH mainaig iti A(H1N1)

Iti panagpalawagna iti sanguanan ti Komite ti Salun-at iti Kamara, kinuna ni Dr. Lyndon Lee Suy, pangulo ti Emerging and Re-emerging infectious Disease Program ti Department of Health nga iti kapardas ti panagwaras ti A (H1N1) virus, maakaran iti daytoy a sakit ti aganay 25% iti kadagupan a populasion ti pagilian wenno 22.5 milion nga umili.

“No projection ti pagpapatangan, iti 2% nga attack rate, makunatayo a namnamaentayo a maapektaran iti 25% ti populasion iti influenza A(H1N1),” imbatad ni Suy.

Iti daytoy a projection ti DoH a posible a mapasamak, arig inakonan a di kabaelan ti opisinada a lapdan ti nadaras unay a panagwaras ti virus a mangapektar iti nagdakkelan a bilang dagiti umili iti sapasap a pagilian iti baet ti sangkakuna dagiti opisial a nainget a panagmonitorda iti dayta a virus sipud nakastrek ditoy pagiliantayo.

Sumangkautro ti dadaulo ti DoH, ni madaydayaw a Sek. Francisco Duque, ta inaldaw a mangegtayo iti telebision a mangireport kadagiti kabarbaro a naapektaran iti virus a kasla ketdin pagpasindayagna ti kaadu ti mamonitorda nga agsakit iti A(H1N1).

Iti daytoy nga ar-aramiden dagiti dadaulo ti DoH, mangparparnuayda laeng iti panagamak dagiti umili a kasla ketdin nakaam-amak a peste daytoy a mangkalaw-it iti adu a biag. Mangparparnuayda iti makadukem a senario a mangisangbay iti pannakariribuk dagiti umili.

Ita pay, madamdamagtayon ti kellaat nga ingingina dagiti alkohol, face mask, sabon, disinfectant ken dadduma pay a pagdalus iti ima ken bagi agsipud iti panagdadarison dagiti umili nga aggatang kadagitoy kas proteksionda iti ballaag nga itden daytoy a virus. Makitatayo met ti kellaat a yaadu dagiti kailiantayo a mapan agpabakuna iti anti-flu kadagiti pribado nga ospital ken agpakonsulta uray bassit laeng ti mariknada a simtoma. Makunatayo a parabur a dakkel kadagiti ospital, parmasiutika ken botika ti panagbalin dagiti umili a health conscious.

Ita, nakuna ti maysa nga agilinlinteg a kasapulan a maikadakkel ti budget a maited iti DOH tapno malapdan daytoy a virus nga agwaras ditoy pagilian. Mangigis la ketdi ti isem dagiti health officials iti daytoy a parabur manipud kadagiti boksingero nga agilinlintegtayo.

Ita, madamagtayo a maysa ni Duque kadagiti maisingsingasing nga agtaray a para senador iti masungad nga eleksion. Iti inaldaw a panagreportna iti telebision kadagiti kabarbaro a kaso ti A(H1N1) virus, naikkan iti libre nga exposure a mabalin a pakaitag-ayan ti panagkandidatona.

Mamatikami nga ar-aramiden laeng dagiti agtuturay ti DOH ti kabaelanda tapno mapugipog daytoy a sakit. Ngem didatayo met mababalaw no sumken ti panagsuspetsa nga adda naun-uneg a rason iti kastoy nga iresponsable (iti biangmi) a panagireport iti makadukem a senario a posible a patauden ti A(H1N1)

Sapay koma ta saan nga agpayso dagitoy a suspetsami. Kaasi pay dagiti kailiantayo no adda sangkailgat a kinapudno dagitoy dimi maiwagat a pampanunot..#

Comments are closed.