Footer

INDAYON NI LAGIP: Dagiti Piglat iti Biagko (Tuloyna)

Da Nana Seling ken Tata Berto ti nagbayad iti panaggianko iti ospital. Idi maammuanda nga awan ti paggawidak, indiayada a mapanak laengen agnaed kadakuada. Simmrotak ngarud kada Nana Seling ken Tata Berto iti balayda idiay Pamplona, Cagayan.

Naammuak nga adda dua nga anakda, lalaki ken babai. Doktor ti lalaki, nars diay babai. Agtrabtrabaho ni doktor iti maysa a dakkel nga ospital iti Manila. Adda met iti Estados Unidos diay narsda.

Pinagtuloydak da Nana Seling a pinagbasa. Impasnekko ti nagadal kas subadko iti kinaanus ken kinalaingda kaniak.

No mapanda idiay ili, ikuyogdak da Nana Seling. Nalukay ti kuartada, aglalo no kasangsangpet ti binulan nga ipaw-it dagiti annakda. Adda latta gatangenda a lupotko. Anak ti nangibilanganda kaniak.

Nagyamanak iti Namarsua ta nakasarakak iti agassawa a nasayaat ti panagpuspusoda. Nagbaliwen a naminpinsan ti lubongko, Manong Danny, ta diakon malak-am dagiti inar-aramid dagiti nagkauna nga imbilangko nga ina ken ama. Iti sidong da Tata Berto ken Nana Seling, napadasak no kasano ti panangipateg ti nagannak iti anakda.

Impagarupko nga agnanayonen a natalinaay ti biagko iti denna da Tata Berto ken Nana Seling ngem nagbiddutak, Manong Danny.

Kalkalpas ti panagturposko iti elementaria idi dimteng ti pasamak a nangbaliw manen iti panaguyas ti biagko.

Bulan ti Mayo idi. Nagbiahekami kada Tata Berto ken Nana Seling a mapan iti Manila tapno bisitaenda ti anakda a doktor ken appokoda. Idi addakamin iti Pangasinan, nakatuglep kano ti drayber ti bus ket naladawen idi makitana ti makasinnabatna a trak.

Dagiti ikkis dagiti pasahero ti naudi a nangegko sa ti napigsa a panagdinnungpar dagiti dua a lugan.

Idi makapuotak, addakamin iti ospital. Pagyamanan ta garumiad laeng ti sugatko. Naammuak a sinallukobandak da Tata Berto ken Nana Seling ket isuda ti nagsagrap iti sugat.

Kasla nagtupak ti langit kaniak iti dayta a pasamak, Manong Danny. Apay nga ita ta nakasarakak iti mangipateg kaniak, dumteng ti trahedia a mangpekka ti panagdedennami?

Tinagisaem unay dagiti annakda ti napasamak. Nakitak dayta iti naem-em a bibigda ken dagiti balikas nga aggaon iti bibigda bayat ti massayag da Tata Berto ken Nana Seling ken idi pannakaipumponda.

Ngem dida la ammo a nasasaem pay kaniak ti napasamak. Kaarigko nakapukaw iti nagannak.

Kalpasan ti pamumpon, kinasaritanak ti asawa ni doktor. Kinunana a nupay kasano ti ayatna a mangala kaniak, dina maaramid dayta ta no makitkitadak bayat ti kaaddak iti dennada nga agassawa, maipalagipto laeng kadakuada ti ipupusay da Nana Seling ken Tata Berto.

Sakbay a pimmanaw dagiti agassawa, pinabalonandak iti kuarta. Nammuak nga inlakoda amin a sanikua da Tata Berto ken Nana Seling agraman ti pagtaenganda. Saanda kanon nga agsubli pay iti Pamplona ta awan metten da Tata Berto ken Nana Seling a sublianda.

(Adda tuloyna)

Comments are closed.