Footer

Marginalized farmers, fishermen, saanda nga agentrada iti tiendaan: proposed ordinance

VIGAN CITY – No makalusot iti sangguniang panlungsod daytoy iproponer ni Konsehal Ever Molina nga ordinansa, saanton nga agentrada dagiti babassitan a mannalon ken mangngalap nga agnaed ditoy siudad no mapanda ilako ti apit ken makalapanda iti tiendaan.

Segun ken ni Molina, nabayagen daytoy a probiso iti Local Government Code a saan nga agbayad iti entrada dagiti marginalized farmers ken fishermen ngem saan daytoy a maim-implementar.

Kinuna ni Molina a rumbeng laeng a saan nga agbayad iti entrada dagiti mannalon nga agilako iti tiendaan ditoy siudad iti apitda iti kanatenganda iti parparaangan wenno dagiti mabanniitan wenno makalapan a lames dagiti mangngalap iti karayan.

Kinuna ti konsehal a dagiti laeng marginalized a mannalon ken mangngalap nga agnaed iti daytoy a siudad ti saklawen daytoy iproponerna nga ordinansa.

Nupay kasta, kinuna ti konsehal a masapul nga adda maaramid a guidelines tapno madetermina no pudno a marginalized ti mannalon wenno mangngalap a mapan aglako iti tiendaan publiko ditoy kasta met a malimitaran ti volume ti lako dagitoy.

“Tapno malisian ti gulo, masapul nga adda maiwayat a guidelines,” kinuna ni Molina idinto nga innayonna nga iproponerna a maysa nga aldaw laeng iti maysa a lawas ti maituding a panaglako dagiti marginalized farmers ken fishermen iti tiendaan publiko manipud iti alas 5 iti malem agingga iti alas dies ti rabii tapno saanda a makikumpetensia kadagiti addaan iti stalls iti tiendaan ken “bareng no mabiag ti rabiitayo”.

Kinuna ti konsehal a maymaysanto a lugar iti tiendaan publiko ti paggianan dagiti nga aglako.

Kinuna ni Molina a mangisayangkatto iti public consultation tapno matingiting ti rikna dagiti amin a sektor mainaig iti daytoy a proposed ordinance.#