Footer

Nars, biktima ti Salisi Gang

VIGAN CITY – Maysa a lalaki a nars ti biktima ti Salisi Gang a nakapukawanna iti selpon ken kuartana.

Segun iti report, magmagna ni Melquiades Ancheta, 23, baro, agnaed iti Lagangilang, Abra, iti Del Pilar Street ditoy siudad idi inasitgan ti maysa a lalaki ket nagsaludsod kenkuana no adda ammona a maupaan a van ta adda kuarta a mapanna ideliber.

Madamdama, immasideg ti sabali a lalaki a nangibaga nga adda ipaupana a van.

Imbati ti lalaki a nagsaludsod ken ni Ancheta ti bag a kunana a naglaon iti kuarta sana sinublat ti selpon ken P500 ti biktima tapno mapanna kapatang ti akinkukua iti van nga upaanna.

Di mabayag, imbaga ti maikadua a lalaki a mapanna kitaen ti umupa iti van ket nabati ni Ancheta a naguray.

Saanen a nagsubli dagiti dua.

Idi luktan ni Ancheta ti bag, naduktalanna laengen a nakartib a pappapel ti linaonna.#