Footer

Puyupoy ti eleksion: 3 presidentiables, timmabuno iti kasangay ni Deputy National Security Adviser Chavit Singson

VIGAN CITY – Mariknan ti yaassibay ti pul-oy ti eleksion iti panagraragup dagiti politiko a nangiparipiripen iti tarigagayda nga agkandidato iti nasional a posision inton 2010 iti panangselebrar dagiti dua a political kingpin ditoy probinsia iti panagkasangayda.

Iti panagkasangay ni Dip. Eric Singson itay Hunio 15, karaman kadagiti sinangailina da Defense Secretary Gilberto Teodoro, ken DepEd Secretary Jesli Lapus.

Imparipiripen ni Teodoro ti tarigagayna nga agkandidato para iti kinapresidente.

Naaweng met ti nagan ni Lapus a maysa kadagiti kandidatuen ti administrasion a para senador.

Tallo a presidentiables ti dimmar-ay iti kasangay ni Deputy National Security Adviser Luis “Chavit” Singson a naangay iti Baluarte, Barangay Tamag idi Hunio 21 a pakairamanan da Metro Manila Development Authority Chairman Bayani Fernando, Senador Manny Villar, Defense Secretary Gilbert Teodoro ken ni DILG Secretary Ronaldo Puno.

Impakaammon ni Villar ti panagkandidatona para presidente inton 2010, idinto a para bise presidente ni Fernando ken Puno.

Kabayatanna, impalgak ni Deputy National Security Adviser Luis “Chavit” Singson nga awan pay ti napilina a suportaran para presidente iti masungad nga eleksion nupay “kualipikadoda amin a presidentiables ken adda pay over qualified ngem ti problema no mangabakda”.

Kinuna ni Singson a kangrunaan a kitkitaenna iti maysa a kandidato ti kabaelanna a mangidaulo iti pagilian, sinsero ken saan a ti agabrot iti gastosna ti atupagenna kalpasan ti panangabakna.

“Kasapulantayo ti estrikto ngem addaan iti puso a lider tapno masursuruan iti disiplina dagiti umili. Kangrunaanna, awan interesna iti kuarta,” kinuna ni Singson.

Mainaig iti isyo ti con-ass, kinuna ni Singson nga adu a paset ti agdama a konstitusion ti rumbeng a maamendaran tapno maiyannatup iti agdama a panawen ngem saanna a kanunongan a mapasamak ti charter change sakbay ti panagpipili inton 2010.

Segun met ken ni Villar ken Fernando, paborda iti pannakabalbaliw ti dadduma a paset ti konstitusion ngem saan a kadagitoy a tiempo.

Kinuna ni Villar a mabalin pay nga ikamakam ti charter change iti panaglukat ti session inton Agosto ngem saan kan a kayat dagiti umili.

“Uray siak, personal a diak kanunongan dayta,” kinuna ni Villar.

Kinuna met ni Fernando a panawenen ti pannakarebisar ti konstitusion gapu ta adun ti rumbeng a mabaliwan a pasetna ngem ti laeng saludsod, no ania a wagas ken no kaano.

Kinuna ni Fernando a no ita a maisayangkat ti cha-cha, sigurado a maaddaan iti risiris gapu ta umadanin ti eleksion.

Sakbayna, impalgaken ni Singson ti posible a panagsublina iti politika iti 2010 elections.#

Comments are closed.