Footer

SARITA: REBOLUSION (Umuna a paset)

Kas kangisit ti uring ti sipnget a simmabat ken ni Sip-i idi luktanna ti akindaya a tawa ti taengda ken ni Pitui Tari. Sinabat ti naumbi nga aplaw; agar-arasaas ngem adda dayta di mailadawan a rikna a maabbukay – patakderenna dagiti muldot; batakenna ti danag.

Pinunnona ti barukongna iti angin. Iti panangibulosna, kasla adda dagensen a nauyos iti kararuana. Ngem apagapaman laeng. Addayta manen ti di makita – mano nga aldawen a kastoy – a bileg a kellaat lattan a dumarup a mangakas iti pigsa ken simbeng ti panunotna.

Riniknana ti bitek ti aglawlaw. Nangrugin nga agkutikuti dagiti kaarrubada; dagiti iturayanna wenno ti sibubukel a lugar. Ammona, adu latta kadagitoy ti di agsarsarday nga agtrabaho uray orasen ti panaginana. Kasta kadi itan ti karigat ti panagbiag?

Napasennaay. Nagpakosina; nangisaang sa insaganana dagiti masapulna inton madamdama.

Nagsanguanda nga agassawa ti daing ken nalabnaw a gatas. Kastoy kadi ti taraon ti maysa a lider iti maysa a lugar? Ngem sapasap ti ikakayetket daytoy a rigat— awan ti lislisianna; kasla angin a sukisokna amin a paset ti lubong.

Napanunotna idi sangaldaw a masapul ti panagsasaritada a lumugar, ta uray kaskasano, maalep-epan daytoy a rigat. Kayatna a denggen ti karirikna dagiti iturayanna, no ania met ti adda iti panunotda; ti pammaliiwda kadagiti karkarna a mapaspasamak iti aglawlaw.

Napnuan dungngo ti arakup ni Pitui Tari iti nagpatnag. Mariknana ti bara iti nagbaetanda. Ngem no apay ket a di mapakpakadaan ti idudupag dayta a bileg— a saan la nga isu ti sagudenna, pati ni baketna. Pagangayanna, masebseban dayta a temtem a di pay gimmil-ayab! Di met ammo ni baketna no apay a kasta ti marikriknana.

Nakadalapustan sa metten, Lakay?” kunkuna daytoy kenkuana.

Saan nga iti awan panamatina iti daldalapus ngem patienna a di daytoy ti rason ti pagkaskastaanda nga agassawa. Kasla adda naun-uneg a ramut ti amin— ket dayta ti rumbeng a takuatenna.

Naisaganam kadin ti sawem no madamdama?’ nagtimek ni Pitui Tari. Agsuksukatdan nga agassawa.

Wen, Baket,” ababa a sungbatna. Maymaysa ti pamuspusan no dumteng dayta a kanito: rumbeng a parimbawenna ti kinaagpayso a maysa a lider – naturay, natibker, ken addaan panirigan!

NAMSEKEN ti dap-ayan idi makagtengda nga agassawa. Maysanmaysa ti nangabrasa kadakuada. Nagtugawda nga agassawa iti sango.

Inwarasna ti panagkitana, kadagiti mata nga agsalsaludsod. Kunam no adda tagtagiurayenda – kas iti panangur-uray ni anak ti daga iti panaglua ti langit tapno maitukitna metten ti bin-i a namnamaenna a mangakup kadakuada iti nakailumlumonda a pitak.

Immanges iti nauneg. Ngem napabaen laeng iti kumulukol a bungsot ti aglawlaw. Ania ketdin, aya, ta di met laengen masolusionan dagita a rugit. Ditoy pay met ngarud asideg ti pagtataripnonganda. Dida met mabalin a yakar ti dap-ayan ta ditoy laengen ti bakante a paset ti lugar. Sa maysa, ditoyda nga impatakder ti bukodda a trono, ditoy a disso a pinagsisiglotda ti linas ti kinaasinoda, ket ditoydan agingga iti maudi a pitik dagiti kanito.

Iti daya, nakadua agpan ti init iti lulonan ti Bantay Oblak. Lumabanag ti marisna a nangpangisit kadagiti ulep iti aglawlawna. Nakarikna iti gitebgiteb: ginunggonna ti urat, piskel, konsentrasion, ken panunotna. Sinalputna ti kararuana.

Tinurongna ti nairanta a paggiananna: iti mawanawananna amin a dimmar-ay. Rinukodna kadagiti mata dagiti naitallaong ti adda a kaririknada. Ditoy, nalawag a maimatanganna ti tunggal reaksion; ditoy, mariknana ti im-impen ti tunggal maysa.

Rinugianna ti nagsarita.

Daytoy banag a dakamatek, Kakabsat,” kinunana, “ket ammok a marikriknayo met. Saan a mailibak a nakaro unayen ti kinnit ti rigat ditoy lugartayo. Adda dagiti banag a mapaspasamak a maikaniwas iti sursurotentayo. Ngarud, kayatko a mangngegan ti kaririknayo ta no adda pannakabalinna, marisut dagitoy a parikut.”

(Maituloyto)

Comments are closed.