Footer

BANNER NEWS: Nakali a bangkay ti karpintero-elektrisian iti naraut a shabu lab, napaltogan ti ulona

NAGUILIAN, La Union – Sinalput ti bala ti akinkannigid a pispis ti nakali a bangkay ti lalaki a mapapati a karpintero-elektrisian ti laboratorio ti shabu a naraut iti maysa a barangay ditoy nga ili idi napan a tawen ket daytoy ti posible a puon ti ipapatayna.

Daytoy ti inisial a resulta ti eksamin dagiti autoridad kalpasan a nakali ti bangkay ti maysa nga agnagan iti Ronnie, ti karpintero-elektrisian a mapapati a pinatay ti caretaker ti naraut a shabu lab iti Barangay Bimmotobot ditoy nga ili idi Hulio 9, 2008.

Indauluan a mismo ni Police Chief Supt. Ramon V. Gatan, PRO1 Regional Director ken hepe ti Task Force Bimmotobot, dagiti nagtitipon a team ti La Union police, Regional Mobile Group 1, PDEA1, ken Regional Crime Laboratory Office 1 ti pannakakali ti bangkay ti managan iti Ronnie, mapapati a karpintero-elektrisian ti nasao a shabu lab.

Sinaksian dagiti opisial ti ili ken barangay ditoy ken dagiti kameng ti media ti pannakakali ti nakaitaneman ti biktima.

Kinuna ni Gatan a maysa daytoy a positibo a pasamak a makatulong iti inbestigasionda ken mangpapigsa iti kaso maikontra kadagiti suspetsa.

Narekobre iti narabaw a tanem ti maysa a bag a naglaon iti ramramit a pakaibilangan ti multi-tester kit, pouch bag a naggianan ti sumagmamano nga ramienta, sinelas ken pala.

Mapapati a pinapatay ni Dante Palaganas, maysa kadagiti natiliw a suspek mainaig iti pannakaraut ti nasao a shabu lab, ni Ronnie idi Nobiembre 2007 gapu ta “adu ti ammona” babaen ti pammilin ni Joselito Artuz, naitudo a pinansier ti laboratorio ti maiparparit a droga.

Rinaut dagiti nagtitipon a bunggoy dagiti polis a pakaibilangan dagiti ahente ti PDEA ti laboratorio ti shabu iti Barangay Upper Bimmotobot idi Hulio 9, 2008 a nakakumpiskaranda kadagiti ramramit a pagaramid iti droga ken ingrediente a mapattapatta a makapartuat iti 180,000 kilos a shabu nga umabot iti maysa a trilion ti pategna.

Naidarum da Palaganas, 6 nga Intsik ken sumagmamano a police officers a pakairamanan ni Supt. Dionisio Borromeo, dati a hepe ti polis ti Dagupan City.

Intudo ni Palaganas ni Borromeo a mapapati a protektor ti nasao a shabu lab.

Ngem pinaglibakan ni Borromeo ti pammabasol.

Kabayatanna, madama a mabirbirok ni Artuz wenno George Cordero a mapapati a pinansier ti nasao a shabu lab.#

Comments are closed.