Footer

Barangay captains, nagtutunos equal sharing iti bingay iti R.A. 7171

SINAIT, Ilocos Sur – No adda grasia, kasapulan nga agpapada ti bingay.

Daytoy ti napagtutunosan dagiti dadaulo dagiti nadumaduma a barangay ditoy nga ili iti insayangkatda nga emerhensia a miting itay nabiit.

Iti daytoy a napagnunummuanan dagiti barangay kapitan, manamnama metten ti pannakaaramid ti appropriation ordinance para iti pannakaruk-at ti pondo para kadagiti amin a barangay ditoy.

Nagbalin a dakkel nga isyo iti napalabas ditoy nga ili lti saan a panagkikinnaawatan ti sangguniang bayan ken ti ehekutibo mainaig iti bingayna iti excise tax ti tabako kas intuding ti R.A. 7171.

Iti immuna a naruk-atan a bingay ti munisipalidad iti R.A. 7171 nga agdagup iti P5.8 milion, maiwaras koma iti 30 a barangay ngem saan nga inanamongan ti sangguniang bayan agsipud ta awan ti bingay ti 14 a barangay a kaadduanna kadakuada ti kangrunaan nga agmulmula iti tabako.

Iti maysa a dialogo nga inangay ti ehekutibo babaen ti initiatibo ni Mayor Marlon Ines, insingasingna a pagbibingayan dagiti 14 a barangay ti P1.5 milion a maikadua a release ti bingay ti munisipalidad iti R.A. 7171.

Ngem kinuna ni ABC President Glen Guzman nga equal sharing ti kayat dagiti saan a nawarasan a barangay ket pagtiponen ti umuna ken maikadua a naruk-atan a pondo manipud iti R.A. 7171 tapno daytoy ti pagbibingayan dagiti 44 a barangay ditoy nga ili.

Imbatad met dagiti sumagmamano a kapitan ti barangay a first priority a nabingayan iti pondo ti R.A. 7171 nga umanamongda iti equal sharing uray maikkatan ti bingayda tapno marisuten ti problema ken mayimplementaren dagiti proyekto a nakaisangratan dagitoy a pondo.

Manamnama a maited ti pondo kalpasan ti panangidatag dagiti barangay captains ti maysa a manipesto ken dagiti priority projects ti sakupda a barangay a pakaigastuan iti bingayda iti R.A. 7171.

Aganay a P166,000 ti bingay ti tunggal barangay iti nagtipon a pondo manipud iti bingay daytoy nga ili iti R.A. 7171.#