Footer

Briton, tinakawan babai nanggayyem kenkuana

VIGAN CITY – Nagpulong iti police station ditoy ti maysa a turista a Briton a mapapati a tinakawan ti maysa a babai a nanggayyem kenkuana.

Nagpatulong ni Barnaby Cooke, 25, baro, taga-London para iti pannakarekobre ti kuartana a P7,000, $150 ken ATM card a mapapati a kinasakas ti di nabigbig a babai a kaduana a nagtsek-in iti maysa a guest house iti Paoay, Ilocos Norte idi Hunio 28.

Mapapati a nakaluganan ti Briton ti nasao a babai iti bus manipud Manila nga agturong iti Ilocos Norte.

Segun iti Briton, ginayyem ti babai ket nagbalinda a nasinged agingga a nagtsek-inda iti maysa a guest house iti Ilocos Norte.

Mapapati nga indiayaan ti babai ti Briton iti mainom ket nakaturog ti biktima.

Idi makariing, awanen ti babai agraman ti kuartana ken ATM cardna.

Segun iti report, intulod ti akinkukua ti guest house iti national highway ket naglugan sa nagsardeng ditoy siudad ti Vigan tapno pairekordna iti police blotter ti napasamak kenkuana tapno adda batayanna a mangrekobre kadagiti natakaw kenkuana.

Kinuyog ti polis ti Briton iti maysa nga internet cafe ket ditoy a kinontakna ti inana tapno mangipatulod iti kuartana.

Intulod pay dagiti polis ti biktima a napan nagtsek-in iti maysa nga otel ditoy siudad, pagur-urayanna iti maipatulod kenkuana a kuarta.

Daytoy ti maikadua a gundaway iti uneg ti makabulan a naloko ti ganggannaet a turista iti nagayyemda a babai.

Naipulong iti polis iti Candon City ti maysa a Singaporean national gapu iti saanna a panagbayad iti nainomna iti maysa a videoke bar iti nasao a siudad.

Naammuan nga immay ditoy pagilian ti nasao a Singaporean national ket nakisinnarak iti Filipina a nakaam-ammona iti internet.

Nagtsek-in dagiti dua iti maysa nga otel iti San Fernando City ngem mapapati nga intaray ti babai ti kuarta ken dadduma pay a sanikua ti foreigner.

Nagpa-Candon City ti biktima tapno birokenna ti babai ngem dina nasapulan.

Iti sakit ti nakemna, nagginom ti foreigner iti maysa a videoke bar ngem dina binayadan ti P2,000 a billna isu a naipulong iti polis.#