Footer

Di naikkan due process: Vice Gov. Jerry

VIGAN CITY – Segun iti bise gobernador, saan a naikkan ti provincial health officer iti due process iti pannakasukatna itay nabiit a hepe ti kadakkelan nga ospital publiko ditoy probinsia.

Daytoy ti imbatad ni Vice Gov. Jerry Singson iti programana a “JCS, Kakibin ti Balligi” a naipatangatang iti DWRS itay Hulio 1.

Kinuna ni Singson a kas chief executive, adda “autoridad ni Gov. Deogracias Victor Savellano a manggamulo iti aniaman a kameng ti gobierno (probinsial)” ngem “ti la saanmi a magustuan” ti mapapati a saan a pannakaited ti due process ken ni Dr. Carmeliza Singson iti pannakaikkatna a kas hepe ti Gabriela Silang General Hospital gapu iti maipagarup a “saan a nasayaat a panangmaneharna” iti nasao nga ospital.

Kinuna ni Singson nga iti panagdamdamagna kadagiti empleado ti nasao nga ospital, “on record a tinawentawen a nakapimpintas ti accomplishmentda agraman dagiti dodoktor ken dagiti empleado iti nasao nga ospital”.

Kinuna ti bise gobernador nga “as far as management is concerned, instead a mai-demote wenno maikkat, maapresiar wenno makomendaran koma pay ni Dra. Singson”.

Itay nabiit, babaen ti maysa nga executive order, dinutokan ni Savellano ni Dr. Winston Aguirre, hepe ti Cervantes District Hospital, nga incharge iti GSGH idinto a tinudinganna ni Singson a mang-supervise kadagiti amin a district hospitals iti probinsia kas provincial health officer.

Sakbay ti pammilin ni Savellano, ni Singson ti dadaulo ti provincial health office ken hepe ti GSGH.

Kinuna ti bise gobernador a saanna a mapabasol ti gobernador ta adda met monitoring team a pinusganna a napan nagmonitor iti ospital ngem impeksana ti pammatina a misinformed ti gobernador mainaig iti kasasaad ti GSGH.

“Ti rigatna, namati ken nagaksion metten (Savellano),” kinuna ni Singson.

Segun ken ni Singson, panggep pay dagiti dodoktor ti ag-mass leave kas suportada ken ni Dra. Singson ngem inupayna ida gapu ta maapektaran dagiti pasiente a sumrek iti nasao nga ospital, kasta met nga imbagana a masapul a respetarenda ti pammilin ti gobernador.

Kinuna ti bise gobernador nga impalgak ni Dr. Aguirre kenkuana a maymaysa ti solusion iti problema ti management iti GSGH, ti panangited ti gobierno probinsial iti naan-anay a pondo iti ospital.

Indagadag ni Singson nga ited ti gobierno probinsial ti naan-anay a budget iti baro nga administrasion ti Gabriela para iti pannakapasayaat ti serbisio.

“Itedda koma ti umisu a budget, dida ipiten, dida taktaken tapno agballigi ti administrasion ni Dr. Aguirre ken maited ti nasayaat a serbisio kadagiti umili,” nakuna ti bise gobernador.

Maysa pay nga isyo a rimmuar itay nabiit ti nanginngina nga agas a mailaklako iti uneg ti ospital ngem kadagiti pribado a parmasia iti ruar iti baet a mapapati a naglasat dagiti medisina iti bidding.#