Footer

EDITORIAL: Nasapa a panagkampania

Inton 2010 pay laeng ti eleksion para iti kinapresidente, bise presidente, ken para senador iti pagilian. Para iti nasional a puesto, inton pay la Nobiembre daytoy a tawen ti impakdaar ti Commission on Elections a panagipila dagiti politiko iti kandidaturada. Ngem ita pay, mangrugin a matutuleng ken masusungeg dagiti umili kadagiti infomercials kadagiti nadumaduma a telebision ken mairita kadagiti pasken ken tarpaulin kadagiti kalkalsada iti siudad a mangibambando iti rupa ken gapuanan dagiti lokal ken nasional nga opisial a nangiparipiripen ken adda panggepna nga agkandidato para iti nangato a posision iti eleksion inton 2010.

Kitaentayo dagiti sumagmamano nga infomercials a nabuyatayo ken madama pay a maipatpatangatang kadagiti nadumaduma a telebision iti pagilian:

*Maysa nga opisial ti gobierno a mangibagbaga a kasapulan a nakasagana dagiti umili no adda dumteng a kalamidad

*Maysa a senador a mangibagbaga kadagiti dua nga ubbing a nasapa a naipako iti trabaho a sidadaan a makirupak maipuon kadakuada

*Sabali pay a senador a mangibagbaga a naggapu iti marigrigat a kasasaad, ngarud, madadaan a tumulong kadagiti marigrigat.

*Maysa nga opisial ti gobierno nga agkaiwara dagiti tarpaulin a nakaikabilan ti rupana a mangibagbaga iti pannakitakunaynay dagiti umili kadagiti paglintegan iti kalsada

*Maysa a nangato nga opisial ti gobierno a mangibagbaga nga ok ti departamento nga idauluanna.

Ibaga la ketdi dagitoy nga opisial a saanda nga agkamkampania ta dida pay impila ti kandidaturada.

Siguro, ipagarup dagitoy nga opisial a muttaleng amin dagiti umili a saan a makailasin a maysa daytoy a panangsalikawkaw iti Election Code a mangiparit ken mangdusa iti panagsalungasing iti nasapa a panagkampania.

Saan a mailibak a nangina dagiti infomercials a maipabuya kadagiti telebision iti sumagmamano laeng a minuto wenno segundo. Ti saludsod: naggapuan dagiti binusbosda para kadagitoy nga infomercials?

Nasayaat no nagtaud ti nabusbos iti bulsada. Ngem kasanon no pondo ti opisinada ti nagtaudanna?

Laglagipen koma dagitoy nga opisial a nagtaud iti buis dagiti umili dagiti pondo a nailatang para iti opisinada. Naited dagita a pondo iti ahensia nga idauluanda tapno maisubli kadagiti umili babaen ti panangitedda iti nasayaat a serbisio.

Suportaranmi ti impila ni Sen. Miriam Defensor-Santiago a resolusion a mangpaimbestiga kadagitoy nga infomercials uray iti baet a siguraduenmi nga awan dumur-asanna. No apay, dayta pugtom, kaparis ti agay-ayuyang iti panunotmi.

Ngem iti biangmi, no maaramat ti pondo ti gobierno para laeng iti pagimbagan ti maysa a tao, maysa daytoy a malbersasion iti kuarta dagiti tattao.#