Footer

OPINION: Dairy industry, kasapulanna ti suporta ti gobierno

Nupay nabayagen ti dairy industry ditoy pagilian, nagbassit ti produksion no maikumpara iti suplay. No kitaen ti estatistika, adayo ti nangarosan ti imported iti bukodtayo a produksion ti gatas. Nasurok a 3.1 million liters laeng ti produksion ti gatas iti pagilian iti kagudua a tawen idinto nga umabut ti imported a gatas iti nasurok a 152.45 million liters. Ngarud, awan pay iti kikit ti produksiontayo iti dagup ti makonsumo wenno kasapulantayo a gatas. Daytoy koma ti isapulan dagiti agtuturaytayo iti sungbat, ti pannakapataudtayo iti makaanay a bukod a produkto ti gatas ta ditayo laeng agang-angkat iti sabali a pagilian.

Kapaliiwan a kadagiti pagtagilakuan wenno iti merkado, umuna a maibus dagiti locally produced a gatas ngem dagiti imported. Kangrunaan a rason ti kinasadiwa ken kinapuro dagii lokal a produktotayo. Saanda a kas iti partuat dagiti ganggannaet a makuna nga addan laokna, a nalabit, ad-adu pay ngata ti laokna ngem ti inumen. Ken maysa, nataltalektayo met laeng a gumatang iti bukodtayo a produkto ngem iti sabali.

Ngem, mapaliiw a nakaro unay ti pannakabaybay-a daytoy nga industriatayo. Saan a maik-ikkan iti importansia. Agkurang ti pannuporta tapno dumakkel ken dumur-as.

Nupay makuna nga adda suporta nga agtaud a mismo kadagiti local producers, a mismo nga inaramatda ti bukodda a resources ken capital, saan pay unay a nabileg dagiti addang a mangsupusop iti agdama a kasapulan ti merkado. Kasapulan unay ti suporta ken teknolohia ken ad-adu pay nga aspeto tapno maikalawa ti produksion ti gatas.

Ta ania ngamin aya ti pagtataudan ti bukodtayo a produksion ti gatas? Saanen a kas idi a paudi no maipanggep kadagiti kabaruanan a pamataudan iti gatas. Saan laengen nga iti gatas ti nuang, a kas iti carabao center iti Nueva Ecija, no di ket kangrunaan itan dagiti gatas nga agtaud manipud iti kalding a mapatpatanor iti Laguna, Bulacan, Pangasinan ken dadduma pay a probinsia.

Kuestion laeng ti kinaawan ti suporta kadagitoy a producers. Iti laengen panaggatang kadagiti paggatasan a taraken ken panangpaadu kadagitoy, dagitoy a producers laeng ti makaammo a mangipamuspusan iti wagas nga aramidenda. Saan met ngarud a napintas a puonan dagiti patanortayo a dingo ta bukod ti kinababassitda, basbassit pay ti gatasda. Isu a kasapulan dagiti imported a maiyasawa kadagiti native a dingnguentayo agingga a makapatanortayo iti kabukbukodan a pammagatasan.

Kastoy a proseso ti ar-aramiden dagiti local producers isu a naginad ti proseso ti panangpaadu iti pamataudan ti gatas.

No koma ta dagiti madaddadael ken makuskusit a pondo ket mausar kadagiti kastoy a pamataudan, mabalin a narang-ay koman ti pagiliantayo. Palubosantayo nga agbukirad ti puseg dagiti exporters, a no dadduma, kusitenda ti rebbengda a bayadan iti gobierno. Ngem iti daytoy a wagas, saan met a matulongan dagiti kailiantayo nga agpursigi a dumur-as.

Nasurok nga 85 porsiento a gatas ti ukkonen dagiti eksporters manipud kadagiti saan a sigurado a suppliers ken importers. Ti nabatbati isu ti bukodtayo a produksion. Nupay adda met linteg a mangsaluad koma iti dairy industry, kas iti National Dairy Act of 1995 wenno ti Republic Act 7884, saanda pay laeng a naikkan iti napigpigsa a takiag tapno naan-anay ti implementasionda. Bassit unay ti puersana a manggubuay koma iti bileg ti lokal nga industria a gatas a dumur-as ken mangikaadu iti produksionna. Agserbi koma dagitoy a linteg a mangitag-ay iti lokal nga industria ti gatas a kangrunaan a pamataudan iti kasapulantayo imbes a para supusopda laeng iti pagkurangantayo iti produksion.

Kasapulan ti industria ti gatas ti agtultuloy a nadur-as a breeding farm a gumatangan dagiti negosiante a mayat a sumrek kadaytoy a pamastrekan. Kasapulan ti nalawlawa a panagsukisok tapno nadardaras ti irarang-ayna. Kasapulan ti adu a cold storage facilities ken kooperatiba nga agserbi a pannakatakiag ti industria. Kangrunaan ti amin, kasapulan ti naan-anay a suporta manipud iti gobierno.#

Comments are closed.