Footer

Opisial ti salun-at, nagtignay malapdan panagadu biktima ti dengue

SAN EMILIO, Ilocos Sur -Nagtignay dagiti opisial ti salun-at ditoy tapno maatipa ti panagraira ti sakit a dengue ditoy nga ili.

Kinuna ni Janet Pascua, sanitary inspector ditoy nga ili, a nagisayangkatda iti inaldaw a fogging operations iti binalbalay nangruna iti Barangay Tiagan ken Luancas, dua a lugar nga addan natay gapu iti dengue.

Naammuan ken ni Pascua a maysan ti natay idinto nga agdagupen iti 18 dagiti nabiktima iti sakit a dengue iti Barangay Lancuas, maysa met ti natay ken 15 dagiti nagsakit iti Barangay Tiagan, idinto a saggaysa ti nagsakit iti Barangay Cabaroan ken San Miliano.

Kinuna ni Pascua a nupay nakontroldan daytoy a sakit, agtultuloy ti panangisayangkatda iti fogging operasions tapno saanen a manayonan pay ti bilang dagiti agsakit iti dengue iti ilida.

Malaksid iti fogging operation, nangisayangkat pay dagiti health officials iti information dissemination kadagiti lumugar, nangruna iti panagdaldalus iti arubayan ken aglawlaw ken panagipattog kadagiti mabalin a pagitlogan dagiti lamok.

Pagyamanan ta inted dagiti opisial ti ili ti full-supportda,” kinuna ni Pascua idinto nga innayonna nga idi nagkiddaw iti pundo tapno makagatangda iti agas, agraman krudo ken para iti transportasion, dagus nga inted dagiti opisial ti ili kadakuada.

Daytoy ti umuna a gundaway nga agraira ti sakit a dengue iti daytoy nga upland municipality.#

Comments are closed.