Footer

Pannakasukat ti hepe ti Gabriela Silang General Hospital: Napapigsa ti akemna kas PH officer: Gov. DV

VIGAN CITY – Saan a naidemot ti provincial health officer no di ket napabileg ti pagrebbenganna tapno maited ti nasaysayaat a serbisio ti salun-at iti probinsia.

Daytoy ti reaksion ni Gov. Deogracias Victor Savellano mainaig iti mapapati a pannakaikkat itay nabiit ni Dra. Carmeliza Singson a kas hepe iti Gabriela Silang General Hospital.

“Saan a nai-demote ni Dra. Carmeliza Singson no di ket napapigsa ti rolena kas provincial health officer,” kinuna ni Gov. Deogracias Victor Savellano bayat ti pannakiinnuman dagiti reporters ti DWRS kenkuana itay nabiit.

Inlawlawag pay ti gobernador nga iti structure ti opisina ti salun-at iti probinsia ni Dra. Singson ti kangatuan kas provincial health officer a mangkita kadagiti amin a district hospitals ket dinawatna iti doktora ti panagtitinnulongda tapno maited ti napimpintas a serbisio kadagiti tattao.

“Dagiti mangibagbaga a naidemot ni Dra. Singson ken Dr. Quedado ket dina maawatan ti pannagnana,” impasagid pay ti gobernador.

Nupay kasta, dina innaganan no asino daytoy.

“…It’s about time nga agtignayak kas gobernador… nasayaat a kitaentayo amin nga isyo, pagkasapulan ken problema… ket once for all, pagtitinnulongan ti amin manipud iti hepe, servers agingga iti kababaan nga empleado,” kinuna ti gobernador.

Dinesignaran itay nabiit ni Savellano ni Dr. Winston Aguirre a kas officer in charge ti Gabriela Silang General Hospital ken tinudinganna ni Dr. Singson a mang-supervise kadagiti amin a district hospitals iti probinsia.

Kinunana a rumbeng laeng a maikkan ti Gabriela Silang General Hospital iti hepe.

Namentener ni Dr. Pablo Quedado a hepe ti Narvacan District Hospital. Sakbayna, assistant chief ti operations iti Gabriela Silang General Hospital ni Quedado.

Kinuna ni Savellano nga iti assessment manipud iti Department of Health, regional office, naibinsabinsa dagiti pagkurangan ti Gabriela Silang General Hospital kasta met nga iti biangna, adda tinudinganna nga agmonitor iti Gabriela ken kadagiti district hospitals tapno maammuan ti pudno a kasasaad dagiti district hospitals iti probinsia.

Kinuna ni Savellano a di pulos naikkat ti talekna ken ni Dra. Singson, pinapigsana pay ketdi ti pagrebbenganna kas provincial health oficer.

Kinuna ti gobernador nga agsasabali ti sistema a nakitana kadagiti district hospitals idinto nga impaganetgetna a “kas maysa a pamilia, dapat maymaysa ti sistema tapno nadardaras ti pannagnana, nadardaras ti pannakaiyussuat kadagiti serbisio a pagkasapulan dagiti tattao.”

Kinuna ni Savellano nga iti mitingda dagiti dodoktor, awan met ti impakitada a sakit ti nakemda sana innayon nga “adda ngata nangkiwkiw kadakuada.”

“Ti bottom line, papigsaentayo dagiti serbisio nga agpaay kadagiti kailiantayo,” kinuna ti gobernador.#

2 Responses to Pannakasukat ti hepe ti Gabriela Silang General Hospital: Napapigsa ti akemna kas PH officer: Gov. DV

  1. Kibungan July 12, 2009 at 11:13 pm #

    Daytoy a pabuya ket masapul a maisardeng. Ania man a tabas ti panagdayaw iti Mannakabalin ket saanna a rebbeng a maipabuya ta ti panagdayaw ket maysa a solemne a banang. Malagip a ti Grand Canao diay Baguio ket kastoy met ti pammabalaw dagiti kakabsattayo a Katutubo.

    Parmataen no kaspagarigan ta maipabuya (exhibit) met ti Misa wenno ti panagnovena iti sanguanan dagiti rineprep a tattao.

    Masapul a dayawen dagiti kakabsat a Katutubo ken ti pammatida (kaannawidan a pammati).

  2. Kibungan July 12, 2009 at 11:16 pm #

    Agpakawanak, sabali ti nakaipis-itak ti kapanunotak. Diay koma Kaannawidan Festival ti tumutop nga yanna ti naipaskilkon ta ngato a saanko met mapugad wenno maiyakar.

    Pakawanendak koma iti nagan ni Kabunian!