Footer

SARITA: REBOLUSION

Mariknak, kakabsat, ti naruay a panagraira dagiti managdakdakes ditoy lugartayo. Nupay dikayo agsasao, ammok a nadlawyon dagiti ganggannaet nga agwarawara ditoy dinappatantayo a disso – a nupay di makuna a ditayo kabukbukodan ta adu dagiti agtawid ken rumbeng a mairanud – disso a mayarig iti templo, disso a pagnaedantayo amin; disso a puon ti biagtayo,” inrugi ni Sip-i.

“’Nia ti kayatmo a sawen, napateg a Sip-i?” sinaludsod ti maysa a dimmar-ay. Nailasinna ni Osup ngem saanen nga isu daydi lumabbasit ken nabusnag nga am-ammona a manarnarawidwid iti kakaisuna a bubon ti lugar.

Osup, dakkel nga ebidensia ti kasasaadmo. Naruay dagiti sugatmo, ti binatlagmo, diak ammo no lusiaw wenno litem ti mangad-adipen kenka. Dimo kad’ ammo a gapuanan dayta dagiti kunkunak a ganggannaet ditoy lugartayo?”

Nautob sa ni Osup ti kinunana ta nagtung-ed daytoy. No itay adda pay laeng maanninawan a tarnaw kadagiti matana, kasla nakumotan itan iti angep.

Napateg a Sip-i, nalawag kaniakon no ania ti kayatmo a sawen,” kinuna ni Otab, ti mangbambantay iti pagbasuraan ti lugar, “Agpayso ti madmadlawmo. Kinaagpaysona, diakon magabenan no maminsan ti trabahok. Saanen a gagangay nga aso dagiti umas-assibay nga agkalkal iti bambantayak. Natatadem dagiti ngipenda. Nagaapges dagiti sugatko gapu kadakuada. Kasano met ngamin, binagon dagiti basura a maur-urnongko iti inaldaw. No maminsan, pabpabasolek ni Wat-Ngi ta ipalubosna a makastrek iti ruangan ti purok dagitoy nga aso. Ania laengen ti serbi dagiti pika a naikumit kenkuana? Dina pay laeng duyoken dagitoy no agpilitda!”

Dagus a timmakder ni Wat-Ngi ket kinunana ken ni Otab: “Gayyem, ak-akmek met ti obligasionko. Kinaagpaysona, kamkamatek ida iti pika. Ngem nasiglatda nga aglisi. Saksik ni Alid kadayta.”

Ni Alid ti kadkadua ni Wat-Ngi. Daytoy ti mangabog kadagiti makalusot tapno agsublida iti ruangan.

Agpayso dayta,” kinuna ni Alid. “Urayak pay ngarud magargarumiadan nga agkamkamat. Ti dakesna, adda rabies dagitoy nga aso a mangbibineg kadakami ken ni Wat-Ngi. Ilibasda nga ikagat kadakami a pakaturoganminton tapno di masinga ti nawaya nga iseserrekda.”

Napasennaay ni Sip-i. Tinaliawna ni Bukobkara nga adda iti sango ni Osup. “Sika, Bukobkara, ania met ti kukueem ta dim’ laengen maatipa dagiti mapalusot da Wat-Ngi ken Alid?” Ni Bukobkara ti agbambantay iti kakaisuna a desdes a sumrek kadagiti nadumduma a paset ti purok.

Mababain ni Bukobkara a timmakder. “Ladingitek, Napateg a Sip-i, ta bassit-usit laeng ti maaramidak kadagiti kakastoy a banag. Ammoyo met a limitado laeng ti kabaelak. Ken kas annurotentayo, no asino ti inikkan ni Wat-Ngi iti permiso a sumrek, siwayawayan daytoy nga agdakiwas.”

Napateg a Sip-i,” intakder met ni Arab iti abay ni Osup, “marigrigatanak metten iti kasasaadko. Kakaasiak a mangsagsagad kadagiti wara dagita a bisita. Agkakapsutak payen ta maris-kapasen ti awitko a pamedped imbes koma nga awanan maris. Marurusokak ngem ania ngarud ket di met kabaelanen ni Silia a sagaten babaen ti buyboyna. Napigsa ngamin unay ti parnuayen nga angin daytoy maris-kapas a bitamina isu nga agdiretso lattan nga awan aniamanna. Siak met, matdaak laeng a maakas ti pigsana.”

Napangariet ni Sip-i. Agrurutapen ti parikut. Tinaliawna ti asawana, kayatna ti umadaw iti pigsa itoy.

Intayag met ni Sigab ti imana. Ni Sigab ti pagdiretsuan dagiti ganggannaet kalpasan iti idadagasda iti Makisto. Awan ti bisita a di dumagas iti Makisto. Ditoy a maarisitda babaen ken ni Tiskob a para bantay. Mangalada iti permisoda tapno agtalinaedda a kas gagangay a lumugar: nawaya nga agdakiwas!

Nalaing dagitoy a ganggannaet, Napateg a Sip-i,” timek ni Sigab, “marigatanak a mamagdasig kadagiti tagilakoda. Ilaokda dagiti rediek kadagiti napintas. Maammuakto laengen dayta no kasta unayen ti namsaakanda. Iti kaburnok dagiti tagilakoda, diak kabaelan nga imurian dagitoy. Idiretsok lattan dagiti maud-udi ken ni Manong. Pagdaksanna, kaaduan a dagiti nalalangto ken sadiwa ti mapalusposak.”

(Adda tuloyna)

Comments are closed.