Footer

3 mangngalap, natiliw nga agus-usar iti compressor

SINAIT, Ilocos Sur – Tallo a mangngalap manipud iti maysa a barangay ditoy nga ili ti tiniliw dagiti fish warden idi Hulio 3 kalpasan a naduktalan dagitoy nga agus-usar iti compressor.

Kinumpiska dagiti fish warden kada Arnold Melendrez, Pedro Ilmeng ken Amboy Libed ti tallo a compressor nga aramat dagitoy iti panagkalapda.

Ngem kalpasan a binagbagaan ida ni Gov. DeograciasVictor Savellano, sinuktan daytoy dagiti nakumpiska a compressor iti iket ken dadduma pay a ramit a pagkalap tapno masigurado a saandan a sublian ti maikaniwas nga aramidda a makadadael iti kabaybayan ti probinsia.

“Sinukatantayo iti iket dagiti natiliw a compressor tapno ipakitatayo a seriosotayo a mangipatungpal iti linteg. Itoy a wagas, maaddaan iti alternatibo dagiti mangngalap ket idiandan ti illegal fishing,” kinuna ti gobernador.

Nupay saan a direkta nga illegal a ramit a pagkalap ti compressor, maus-usar a pagangsan dagiti mangngalap no bumatokda iti baybay tapno kitaenda no adu ti bunggoy ti lames sakbay a bungbongenda dagitoy.

Iti interbio ni Benny Saraos, provincial officer ti Bureau of Fisheries and Aquatic Resources (BFAR), ken ni Danny Tajon iti programa daytoy itay nabiit, kinunana a makaapekto iti salun-at ti panagaramat iti compressor.

Segun ken ni Saraos, makaited iti sakit ti panagusar iti nasao a ramit agsipud ta nakakonekta iti motor ti bangka ket ti asuk ti makina ti angsen ti bumabatok.

Itay nabiit, naisayangkat dagiti panagsanay dagiti reservist ti Philippine Army kas fish wardens idi Mayo babaen ti BFAR tapno agbalinda a katulongan iti pannakapugipog ti illegal a panagkalap iti probinsia.#

Comments are closed.