Footer

BANNER NEWS: Sakit ti baboy iti 4 barangay ti Sta. Lucia, suspetsa a naggapu iti Pangasinan

STA. LUCIA, Ilocos Sur – Suspetsaen ti maysa nga opisial ti ili a naakaran dagiti taraken a baboy dagiti agnaed iti uppat a barangay ditoy nga ili manipud iti burias a naggapu iti Pangasinan a posible nga addaan iti virus a Porcine Reproductive and Respiratory Syndrome.

Segun ken ni Konsehal Eduardo Tuquero, chair ti committee on agriculture ti konseho munisipal iti daytoy nga ili, kangrunaan a suspetsada a ti nagatang dagiti lumugar a burias manipud iti Pangasinan ti nagtaudan ti virus.

Naipadamag iti kallabes ti kaadda ti sakit ti baboy iti nadakamat a probinsia.

Kinuna pay ni Tuquero bayat ti pannakipatpatang kenkuana ti DZTP a suspetsada pay a dagiti rugit a naidaknir kadagiti naapektaran a barangay idi naglayus ti slaughterhouse iti naudi a panagbagyona ti nagtaudan ti virus a PRRS.

Agdagupen iti nasurok a sangagasut ti natay a baboy idinto a nasurok a 130 ti naapektaran iti panagraira ti virus a PRRS iti sumagmamano a barangay a pakairamanan ti Barangay Buliclic, Pila East, ken Conconig Este ken Angkileng.

Iti report a dimmanon iti DZTP ken daytoy a pagiwarnak, agdagupen iti nasurok a 50 dagiti baboy a natay a nagsakit iti PRRS iti Barangay Angkileng.

Segun iti maysa nga opisial ti Barangay Angkileng, awan ti mairuar a baboy manipud kadagiti naapektaran a barangay a pakairamanan ti lugarda.

Kasta met a naikali a dagus dagiti natay a nagsakit a baboy.

Iti panagpasiar ti DZTP iti daytoy a barangay, naammuan a nasurok a 35 a burias ken 2 a takong ti natay a taraken ni Manang Luciana Fernandez a mapattapatta nga agpateg iti nasurok a P100,000.

Dua a takong ken dua a burias met ti inkali ni Alejo Ballerta idinto a sumaggaysa dagiti dadduma pay a bumarangay.

Segun ken ni Mang Alejo, nasuroken a tallo a lawas ti panagraira ti PRRS iti lugarda.

Kangrunaan a sintoma dagiti nagsakit a baboy ti panagngesngesda ken saanda a pannakatakder.

Naidanon metten iti imatang ti provincial veterinarian ti pannakatay dagiti baboy kadagiti nadakamat a barangay.

Itay Hulio 7, nangala ti beterinario ti probinsia iti sample manipud iti naguneg ti maysa a natay a baboy tapno maamiris iti laboratorio no ania a talaga ti nakatayanda.

Manamnama a maammuan ti resulta ti panagamiris kalpasan ti makalawas.

Maysa a virus ti PRRS a mang-atake iti immune system dagiti baboy nga agtungpal iti kalakada a kapten ti inpeksion ken sakit.

Nupay kasta, segun kadagiti autoridad, saan a maiyakar daytoy a sakit kadagiti tattao.

Ngem maysa a beterinario ti nagkuna a lutuen a nalaing ti karne ti baboy tapno masigurado a matay ti virus a kargana.#

Comments are closed.