Footer

EDITORIAL: Anti-political dynasty, panawenen a maipakat

Dua a gakat maikontra iti politikal a dinastia ti saan a nakalusot a pimmasa bayat ti maika-13 a Kongreso. Gapu iti daytoy, binaliwan nga impila ni Majority Leader Arthur Defensor tapno matratar manen iti sumaruno a panagsession ti Kongreso. Ni Deputy Minority Leader Satur Ocampo ti autor ti sabali a gakat.

Ngem ti saludsod: dumur-as ngata dagitoy a gakat tapno mapukaw ti panangiggem ti maymaysa wenno sumagmamano laeng a pamilia iti turay, iti nasional man wenno lokal a gobierno?

Kuna ti konstitusion: Garantiaan ti Pilipinas ti agpatas nga access kadagiti oportunidad para iti serbisio publiko ken ipawilna ti politikal a dinastia kas intuyang ti linteg.

Ngem agingga ita awan pay ti enabling law tapno agbalin nga epektibo ti nasao a probiso gapu ta iwalwalin dagiti maraem nga agilinlintegtayo.

Saan a nakakaskasdaaw daytoy ta kaaduan kadagiti agilinlintegtayo, iti man Kamara wenno iti Senado, ken uray dagiti agtuturay kadagiti probinsia ken siudad ti maapektaran iti anti-political dynasty ti konstitusion.

Saantayon nga umadayo iti ngato, iti kangatuan a posision iti turay iti pagilian.

Pagarigan laengen ni Pres. Arroyo: dagiti annakna, ni Juan Miguel Arroyo ti diputado ti Pampanga, ken ni Dato Arroyo ti pannakabagi ti Camarines Sur idinto a diputado da Ignacio Arroyo ken Ma. Lourdes Arroyo, kayong ken ipagna.

Iti biang ni dati a Pres. Estrada, nagbalin a senador ni Jinggoy Estrada idinto a mayor ti San Juan ti sabali nga anakna, ni JV Ejercito. Nagsenador pay ni Loi Estrada nga asawana.

Saantayon a dakamaten pay ti kaadda dagiti agassawa, agama, agkabsat, agkasinsin, ken asideg nga agkakabagian a nakatugaw iti nadumaduma a puesto iti Senado, Kamara, distrito, probinsia, siudad ken ili a kasla ketdin pagtatawidan, pagsisinnublatan, pagiinnallawatan, pagririnnanudan dagitoy para laeng iti bukodda a pamilia.

Iti pannakabiag manen ti dua a gakat kontra anti-dinastia iti Kamara, manamnama a saan a sakloten lattan dagiti maapektaran a politiko ti dakulapda ket aramidenda amin a kabaelanda a mangitalmeg kadagitoy tapno saanda a dumur-as.

Makunatayo a nakataya ditoy ti bukodda nga interes a saanda a mabalin lattan nga irukma tapno maipakat ti naan-anay a reporma iti istruktura ti politika iti pagilian.

Ti dinastia ti nagbalin a dakkel a siit iti karabukob dagiti umili a maysa kadagiti kangrunaan a rason no apay a saan a dumur-as ti pagilian, no apay a nasaknap ti korapsion ken panagkunniber, no apay a pagpipinnadakesan ken pagpipinnatayan ti politika ditoy pagilian.

Suportaranmi ti pannakabiag manen ti anti-dynasty iti Kamara nupay saankami nga optimistiko a maikkan daytoy iti naan-anay nga atension kadagiti managimbubukod a politiko nangruna iti daytoy a panangrugi manen a nakaturong ti imatangda iti pannakapabileg ti teritorioda inton umay a tawen.

Ngem kastay kunadan, saan a dakes ti mangnamnama, nupay kas kailet ti abut ti dagum ti lasaten dagitoy a gakat iti panagbalinda a linteg.#

Comments are closed.